হাইলাকান্দিত জলসম্পদ বিভাগৰ তদন্তত মুখ্যমন্ত্ৰী তদাৰকী শাখা

"2010 চনত বৰাক নদীৰ কৰাল গ্ৰাসত ক্ষতিগ্ৰস্থ হৈছিল 53 নং ৰাষ্ট্ৰীয় ঘাইপথৰ এটি বৃহৎ অংশ ৷ ইয়াৰ পাচতেই জলসম্পদ বিভাগলৈ ভগা অংশ মেৰামতিৰ বাবে কেইবা কোটি টকা আগবঢ়াইছিল চৰকাৰে ৷ কিন্তু বৰ্তমান পৰ্যন্ত সম্পূৰ্ণভাৱে মেৰামতি হোৱা নাই ৰাষ্ট্ৰীয় ঘাইপথৰ এই অংশ"

হাইলাকান্দি, 3 জুনঃ হাইলাকান্দিত জলসম্পদ বিভাগৰ তদন্তৰ বাবে উপস্থিত মুখ্যমন্ত্ৰী তদাৰকী শাখাৰ দল ৷ 53 নং ৰাষ্ট্ৰীয় ঘাইপথৰ মেৰামতি সম্পৰ্কে জানিবলৈ উপস্থিত হয় দলটো ৷ উল্লেখ্য যে, 2010 চনত বৰাক নদীৰ কৰাল গ্ৰাসত ক্ষতিগ্ৰস্ত হৈছিল 53 নং ৰাষ্ট্ৰীয় ঘাইপথৰ এটি বৃহৎ অংশ ৷ ভঙা অংশ মেৰামতিৰ বাবে জলসম্পদ বিভাগক চৰকাৰে কেইবাকোটি টকা আৱণ্টন দিছিল যদিও বৰ্তমান পৰ্যন্ত সম্পূৰ্ণভাৱে মেৰামতি হোৱা নাই ৰাষ্ট্ৰীয় ঘাইপথৰ এই অংশ ৷ যাৰ বাবে জল সম্পদ বিভাগে পাচগ্ৰামৰ এই ভঙা অংশ প্ৰতিৰোধৰ নামত দুৰ্নীতি কৰাৰ অভিযোগ উত্থাপন কৰি 2017 চনত মুখ্যমন্ত্ৰীৰ কাষ চাপিছিল একাংশ স্থানীয় লোক ৷ ইয়াৰ পাচতেই মুখ্যমন্ত্ৰীয়ে তদাৰকী শাখাক এই দুৰ্নীতিৰ তদন্তৰ দায়িত্ব প্ৰদান কৰিছিল ৷ সেই পৰিপ্ৰেক্ষিততে সোমবাৰে মুখ্যমন্ত্ৰীৰ তদাৰকী শাখাৰ এটা তদন্তকাৰী দলে উক্ত ঠাইত উপস্থিত হৈ পৰিস্থিতিৰ বুজ লয় ৷ লগতে শিলচৰ এন আই টিৰ পৰা এটা টেকনিকেল দলো উপস্থিত থাকে ৷ আনহাতে, বৰাক নদীৰ পানীৰ স্তৰ বৃদ্ধি পোৱাৰ বাবেই তদন্ত সম্ভৱ হোৱা নাই বুলি মন্তব্য তদাৰকী দলটোৰ ৷