বোকাখাত, 25 নৱেম্বৰ: ৰাজ্য চৰকাৰে চিকিৎসা মহাবিদ্যালয়, চিকিৎসা নিৰ্মাণ কৰি স্বাস্থ্যখণ্ডৰ উন্নতিৰ যিদৰে জয়গান গাই আহিছে তাৰ বিপৰীতে ৰাজ্যৰ একাংশ চিকিৎসালয়ৰ শোচনীয় অৱস্থাই স্বাস্থ্যখণ্ডৰ উন্নয়নৰ আন এখন বিপৰীত ছবিহে প্ৰতিফলিত কৰা পৰিলক্ষিত হৈছে । কিয়নো ৰাজ্যৰ প্ৰতিখন জিলাতে আছে একোখনকৈ অসামৰিক চিকিৎসালয় ৷ কিন্তু এই অসামৰিক চিকিৎসালয়সমূহৰ অধিকাংশতেই নাই পৰ্যাপ্ত পৰিমাণৰ চিকিৎসা সেৱা, চিকিৎসক কিম্বা নাৰ্ছ । যাৰ কু-ফল ভোগ কৰিবলগীয়া হয় সাধাৰণ জনতাই ৷ সু চিকিৎসা ব্যৱস্থাৰ অভাৱতে ৰাজ্যত বিভিন্ন সময়ত বহু লোকে প্ৰাণ হেৰুৱাবলগীয়া হৈছে ৷ এনে ঘটনাৰ বহু উদাহৰণ প্ৰায়েই দেখিবলৈ পোৱা যায় ৷ তেনে এখন চিকিৎসালয় হৈছে বোকাখাতৰ স্বহীদ কমলা মিৰি অসামৰিক চিকিৎসালয় ।
মাত্ৰ এজন চিকিৎসকেৰে চলিছে বোকাখাতৰ স্বহীদ কমলা মিৰি অসামৰিক চিকিৎসালয়খন (Swahid Kamala Miri Civil Hospital)। চিকিৎসকৰ অভাৱত সম্পূৰ্ণভাৱে বন্ধ বহিঃৰোগী বিভাগ (OPD)। জৰুৰীকালীন বিভাগত মাত্ৰ এজন চিকিৎসকে কৰিছে চিকিৎসা । ইয়াৰ বিপৰীতে ৰোগীৰ দীঘলীয়া শাৰী চিকিৎসালয়খনত । চিকিৎসালয়খনৰ সৰহসংখ্যক চিকিৎসকেই চুটি লোৱাৰ লগতে পদোন্নতি লৈ অন্য ঠাইলৈ বদলি হোৱাত প্ৰায় চিকিৎসক শূন্য হৈ পৰিছে চিকিৎসালয়খন ।
বিয়াগোম অট্টালিকাৰেৰে দেখাত এখন সুন্দৰ চিকিৎসালয় । কিন্তু ভিতৰ চৰা দেখিলেলেহে গম পোৱা যায় আন এক ৰূপ । বোকাখাত মহকুমাৰ একমাত্ৰ চিকিৎসালয়খনত নাই কোনো মেডিচিনৰ ডাক্তৰ । পৰ্যাপ্ত চিকিৎসকৰ অভাৱৰ বাবেই চিকিৎসালয়খনত প্ৰসূতি ৰোগীৰ অস্ত্ৰোপচাৰ কৰা হয় সপ্তাহৰ দুটা নিদিষ্ট বাৰত । একেদৰে পৰ্যাপ্ত ঔষধৰো অভাৱ চিকিৎসালয়খনত । একেদৰে দন্ত আৰু অস্থিৰোগৰ বিশেষজ্ঞ চিকিৎসকো সপ্তাহত দুদিনকৈহে বহে চিকিৎসালয়খনত ।
ইফালে যি এটা আওপুৰণি আল্ট্ৰাচাউণ্ড মেচিন আছে সেইটোও প্ৰায়ে বিকল হৈ থাকে । পৰ্যাপ্ত চিকিৎসক তথা চিকিৎসাৰ সা-সৰঞ্জাম নথকাৰ বাবেই সামান্য দূৰ্ঘটনা এটা হলেও প্ৰাৰম্ভিক চিকিৎসা কৰিয়েই চিকিৎসালয়খনৰ পৰা যোৰহাটলৈ স্থানান্তৰিত কৰে ৰোগীক । বাহিৰৰ পৰা প্ৰকাণ্ড অট্টালিকাৰে জিলিকি থাকিলেও ভিতৰত একো সুবিধা পাবলৈ নাই চৰকাৰী চিকিৎসালয়খনত । এই লৈ এতিয়া ক্ষোভিত হৈ পৰিছে ৰোগীৰ আত্মীয় ।
লগতে পঢ়ক: Tejaswita Baruah death: কি পালে তেজস্বিতা বৰুৱাৰ মৃত্যুৰ তদন্তত ?
