গোলাঘাট, 16 মে’: গোলাঘাট নগৰৰ মাজমজিয়াতস্থিত ৰ'দালী পইণ্টৰ গান্ধী প্ৰতিমূৰ্তিৰ তলত প্ৰতিবাদ সাব্যস্ত সদৌ অসম দুৰ্নীতি নিবাৰক আৰু প্ৰকৃতি সুৰক্ষা সমিতিৰ। অবৈধভাৱে চলি থকা চোৰাং বেহা আৰু নদীত বিহ ঢালি মাছ নিধন কৰা কাৰ্য বন্ধ কৰাৰ দাবীত দুই ঘণ্টীয়া অৱস্থান ধৰ্মঘট কাৰ্যসূচী ৰূপায়ণ কৰে সমিতিয়ে ৷ গোলাঘাটত মদ, ভাং, ড্ৰাগছ, লালীগুৰ আদি অবৈধ কাৰ্যকলাপৰ লগতে ধনশিৰি আৰু দৈয়াং নদীত বিহ ঢালি মাছ নিধন কৰা কাৰ্য বন্ধৰ দাবীত বৃহস্পতিবাৰে এই দুঘন্টীয়া অৱস্থান ধৰ্মঘট প্ৰতিবাদী কাৰ্যসূচী পালন কৰা হয়।
প্ৰতিবাদস্থলীৰ পৰাই চৰকাৰক সকীয়নি প্ৰদান কৰি অতি শীঘ্ৰে চৰকাৰে অবৈধ বেহা বন্ধ নকৰে তেনেহ'লে ভৱিষ্যতে তীব্ৰ গণতান্ত্ৰিক আন্দোলন গঢ়ি তোলাৰ হুংকাৰ প্ৰদান কৰে সদৌ অসম দুৰ্নীতি নিবাৰক আৰু প্ৰকৃতি সুৰক্ষা সমিতিটোৱে ৷