গোলাঘাট , 07 মে' : সৰুপথাৰৰ পৰা উৰিয়ামঘাট সংযোগী গড়কাপ্তানী পথছোৱা ক্ৰমান্বয়ে জৰাজীৰ্ণ ৰূপ ধাৰণ কৰিছে ৷ ঠিকাদাৰ আৰু বিভাগীয় কৰ্তৃপক্ষৰ লুণ্ঠনৰ ফলত পথ নিৰ্মাণৰ কাম নিম্নমানৰ হোৱা বুলি অভিযোগ কৰিছে ৷
সৰুপথাৰৰ পৰা উৰিয়ামঘাট সংযোগী গড়কাপ্তানী পথটোৰ জৰাজীৰ্ণ অৱস্থাৰ বাবে পথচাৰীসকলে জ্বলাকলা খাবলগীয়া হৈছে ৷ পথৰ মাজতে সৃষ্টি হোৱা দ' গাঁতৰ ফলত বিপদ সংকুলভাৱে সাধাৰণ ৰাইজে যাতায়ত কৰিবলগীয়া হৈছে ৷
ৰাইজৰ অভিযোগ অনুসৰি গড়কাপ্তানী বিভাগৰ সৰুপথাৰ গ্ৰাম্য পথ সংমণ্ডলৰ অধীনস্থ পথছোৱা নিৰ্মাণ কৰা মাত্ৰ ডেৰ বছৰ পাচতে পথছোৱা যাতায়তৰ বাবে অনুপযোগী হৈ পৰিছে ৷ লগতে ঠিকাদাৰ আৰু বিভাগীয় কৰ্তৃপক্ষৰ বুজাবুজিৰ ফলত পথ নিৰ্মাণৰ কাম নিম্নমানৰ হোৱাৰো অভিযোগ কৰে স্থানীয় ৰাইজে ৷ সেয়ে শীঘ্ৰে অসম চৰকাৰৰ গড়কাপ্তানী বিভাগে যদি পথটো নিৰ্মাণ নকৰে তেতিয়া স্থানীয় ৰাইজ তথা দল-সংগঠনে এক জংগী আন্দোলন গঢ়ি তোলাৰ হুংকাৰ দিয়ে ৷
