সৰুপথাৰ,31 অক্টোবৰঃ পাক অধীকৃত কাশ্মীৰত 20 অক্টোবৰ তাৰিখে পাকিস্তানী সেনাৰ গুলিত নিহত হোৱা বীৰ শ্বহীদ পদম বাহাদুৰ শ্ৰেষ্ঠৰ আদ্যশ্ৰাদ্ধ অনুষ্ঠিত ৷ বৰপথাৰৰ দীঘলীপথাৰৰ হাতীঘুলিস্থিত নিজ পিতৃৰ বাসগৃহত বৃহস্পতিবাৰে সম্পূৰ্ণ সামাজিক ৰীতি নীতিৰে অনুষ্ঠিত হয় শ্বহীদ গৰাকীৰ আদ্যশ্ৰাদ্ধ ৷ অসংখ্য গুণমুগ্ধৰ লগতে বিভিন্ন দল সংগঠনৰ নেতা কৰ্মীয়ে আহি শ্বহীদ গৰাকীৰ পৰিয়ালৰ কাষত থিয় হৈ সমবেদনা জ্ঞাপন কৰে ৷ আনহাতে স্বামীৰ আদ্যশ্ৰাদ্ধত স্বাভাৱিকতে শোকত ভাগি পৰে পত্নী ধল বাহাদুৰ শ্ৰেষ্ঠ ৷ একেদৰে পিতৃৰ সপোন আৰু স্মৃতি সুঁৱৰি উচুপি উঠে শ্বহীদ গৰাকীৰ কন্যাও ৷
ইফালে শুকুৰবাৰে শ্বহীদ গৰাকীৰ হাতীঘুলিস্থিত পিতৃ গৃহতেই আয়োজন কৰা হৈছে ৰাজহুৱা আদ্যশ্ৰাদ্ধৰ ৷ এই অনুষ্ঠানত মুখ্যমন্ত্ৰী সৰ্বানন্দ সোণোৱাল উপস্থিত থাকি শ্বহীদ গৰাকীক শ্ৰদ্ধা জনোৱাৰ লগতে শোকসন্তপ্ত পৰিয়ালটোক সমবেদনা জ্ঞাপন কৰিব ৷ দুপৰীয়া 12 বজাত বৰপথাৰৰ চকলি খেলপথাৰত মুখ্যমন্ত্ৰীৰ হেলিকপ্টাৰে অৱতৰণ কৰাৰ পাচতেই পোনে পোনে ৰাওনা হ'ব শ্বহীদ গৰাকীৰ বাসগৃহলৈ ৷
কিন্তু গুৰুত্বপূৰ্ণ যে,শ্বহীদ গৰাকীৰ অন্তিম সৎকাৰৰ পাচৰে পৰা ধনশিৰি মহকুমা প্ৰশাসনে পৰিয়ালৰ লোকৰ কোনো ধৰণৰ খা খবৰ নোলোৱাত স্থানীয় ৰাইজে তীব্ৰ অসন্তুষ্টি প্ৰকাশ কৰিছিল ৷ এই বিষয়ে সংবাদ মাধ্যমত বাতৰি সম্প্ৰচাৰ হোৱাৰ পাচতহে বৃহস্পতিবাৰে মহকুমা প্ৰশাসনৰ লোক আহি শ্বহীদ গৰাকীৰ ঘৰত উপস্থিত হৈছে বুলি জানিবলৈ দিছে স্থানীয় ৰাইজে ৷
