বেংকৰ ঋণ পৰিশোধ নকৰাৰ বাবেই গৃহহাৰা হ’ল এটা পৰিয়াল

গোলাঘাট জিলাৰ মৰঙীত বেংকৰ ঋণ পৰিশোধ নকৰি বিপদত এটা পৰিয়াল ৷ বেংক কৰ্তৃপক্ষৰ আৰক্ষী আৰু দণ্ডাধীশৰ উপস্থিতিত চীল কৰিলে বাসগৃহ।

গোলাঘাট,14 অক্টোবৰঃ আপুনি ৰাজহুৱা খণ্ডৰ বেংকৰ পৰা ঋণ লৈ সময়মতে ঋণ পৰিশোধ কৰা নাই নেকি ? যদি নাই কৰা তেনেহলে সাৱধান ৷ ঋণ পৰিশোধ কৰিব নোৱাৰাৰ বাবে ঘৰ খালি কৰি বাহিৰলৈ ওলাবলৈ বাধ্য মৰঙীৰ এটা পৰিয়াল ৷ দণ্ডাধীশ আৰু আৰক্ষীৰ উপস্থিতিত বেংক কৰ্তৃপক্ষই চীল কৰিলে ঘৰ ৷

উল্লেখযোগ্য যে, মৰঙী পানীকৰা গাঁৱৰ ললিত বুঢ়াগোহাঁই নামৰ লোকজনে গোলাঘাটৰ ৰঙাজান বেংক অফ বৰোদাৰ পৰা প্ৰায় ১৮ মাহ পূৰ্বে দহ লাখ টকা ঋণ লৈ পৰিশোধ কৰা নাই এটকাও ৷ ইপিনে টকা পৰিশোধ নকৰাৰ বাবে নটিছৰ উপৰি নটিছ দি ভাগৰিল বেংক কৰ্তৃপক্ষই ৷ যাৰ বাবে দণ্ডাধীশ আৰু আৰক্ষীৰ উপস্থিতিত বেংক কৰ্তৃপক্ষই ঘৰৰ ভিতৰৰ সকলো আচবাব বাহিৰ কৰি চীল কৰি দিয়ে ললিত বুঢ়াগোহাঁইৰ ঘৰটো ৷ আনহাতে এমাহৰ ভিতৰত ঋণ পৰিশোধ নকৰিলে বেংক কৰ্তৃপক্ষই মাটি সম্পত্তি নিলাম কৰি ঋণ আদায় কৰিব বুলি জানিব পৰা গৈছে ৷

লগতে পঢ়কঃ বিহাৰ নিৰ্বাচন: হাছানপুৰত মনোনয়ন দাখিল তেজ প্ৰতাপৰ