গোলাঘাট, ৩ মাৰ্চ : গোলাঘাটত শনিবাৰে সন্ধিয়া মুকলি কৰা হয় প্ৰকৃতিবিদ পদ্মশ্ৰী ডাঃ ৰবীন বেনাৰ্জী সংগ্ৰহালয় । ভাৰতীয় প্ৰশাসনিক সেৱাৰ বিষয়া ডঃ ৰবি কোট্ৰাই মুকলি কৰে এই সংগ্ৰহালয়টো । দীৰ্ঘদিন ধৰি মেৰামতিৰ অভাৱত জৰাজীৰ্ণ হৈ পৰা বেনাৰ্জীৰ এই সংগ্ৰহালয়টোক পূৰ্ণতাৰ ৰূপ দি শনিবাৰে আনুষ্ঠানিকভাৱে মুকলি কৰে ডাঃ ৰবীন বেণাৰ্জী ট্ৰাষ্টে । উক্ত অনুষ্ঠানত অৰণ্য মানৱ যাদৱ পায়েং ,প্ৰকৃতিপ্ৰেমী তথা সাংবাদিক মুবিনা আখটাৰ , গোলাঘাট জিলা উপায়ুক্ত ধীৰেণ হাজৰিকে ধৰি বহু বিশিষ্ট ব্যক্তি উপস্থিত থাকে ।
ডাঃ ৰবীন বেনাৰ্জী সংগ্ৰহালয়ৰ মুকলি উল্লেখ্য যে, প্ৰকৃতিবিদ ডাঃ ৰবীন বেনাৰ্জীয়ে পঞ্চাশ দশকতে অসমৰ এশিঙীয়া গঁড়ক চিনাকি কৰি দিছিল বিশ্ববাসীৰ ওচৰত ।দ্বিতীয় বিশ্বযুদ্ধৰ সময়ত বৃটিছ নৌ সেনাৰ চিকিৎসক হিচাপে কৰ্মৰত আছিল ডাঃ বেনাৰ্জী । দ্বিতীয় বিশ্বযুদ্ধ শেষ কৰি স্ব-গৃহ পশ্চিমবংগলৈ ঘূৰি আহিছিল ৰবিন বেনাৰ্জী । তাৰ পাচতেই অসম লৈ আহি অসমৰ শান্তিময় স্থান আৰু প্ৰাকৃতিক সৌন্দৰ্য্যত আপ্লুত হৈ মৃত্যুৰ সময়লৈকে অসমতে থকাৰ সিদ্ধান্ত লৈছিল তেওঁ । তেতিয়াৰ পৰাই অসমত চাহ বাগিচাত চিকিৎসক ৰূপে সেৱা আগবঢ়াইছিল ৰবিন বেনাৰ্জীয়ে । ১৯৫২ চনতে কাজিৰঙাৰ ওপৰত তথ্যচিত্ৰ নিৰ্মাণ কৰি ১৯৬২ চনত জাৰ্মানীৰ বাৰ্লিন টেলিভিছনত তথ্যচিত্ৰখন সম্প্ৰচাৰণ কৰি বিশ্বৰ প্ৰেক্ষাপটত উপস্থাপন কৰিছিল কাজিৰঙাক ।
