গোলাঘাটত ধনশিৰিৰ বানৰ তাণ্ডৱ অব্য়াহত

এতিয়াও পানীৰ তলত বুৰি আছে গোলাঘাটৰ বহু অঞ্চল ৷ আবতৰীয়া বানৰ কবলত পৰা অঞ্চলটোৰ কেবাখনো গাঁও জলমগ্ন হোৱাৰ ফলত বহু লোকৰ ঘৰ বাৰী,খেতি পথাৰ,অঞ্চলটোৰ বাট পথ আদি বিগত পাঁচ দিন ধৰি বানত বুৰ গৈ আছে |

গোলাঘাট,30 অক্টোবৰঃ ধনশিৰি নদীৰ আবতৰীয়া বানপানী সৰুপথাৰৰ কিছু কিছু ঠাইত কিছু হ্ৰাস পাইছে যদিও মহকুমাটোৰ, চুঙাজান,নাওজান,সৰুপথাৰ,বৰপথাৰ এলেকাত ধনশিৰি নদীৰ বানত বুৰ যোৱা গাঁও সমূহত পানী কিছু কমিছে যদিও পুনৰ ন ন অঞ্চল প্লাৱিত হোৱাৰ কথা জানিব পৰা গৈছে ৷ টেঙানী গাঁও পঞ্চায়তৰ ঔ গুৰী আলি ছিঙা, ২নং কেঁকুৰি মিছিং গাঁও, ১নং কেকুৰী,বৰচাপৰি আদি গাঁৱৰ প্ৰায় ৩০০টা কৃষিজীৱি পৰিয়ালৰ ঘৰ বাৰী,খেতি পথাৰ ধনশিৰি নদীৰ আবতৰীয়া বানত বুৰ গৈছে | একেদৰে ২ নং কেকুৰী মিছিং গাৱৰ ৪৫ টা পৰিয়ালৰ ঘৰ বাৰী এতিয়াও পানীৰ তলত ৷

আবতৰীয়া বানত বুৰ গৈছে গোলাঘাটৰ বিস্তীৰ্ণ অঞ্চল

হঠাৎ অহা ধনশিৰি নৈৰ আবতৰীয়া বানে কৃষিজীৱি লোকসকলৰ ঘৰত মজুত ৰখা ধান,চাউল,কাপোৰ কানি,ছাত্ৰ ছাত্ৰীৰ কিতাপ পত্ৰ আদি বানে উটুৱাই নিয়ে ৷ একদৰে একাংশ লোকৰ পশুধন গাহৰি,গৰু ছাগলী আদিও পানীত উটি গৈছে | বিশেষকৈ খাদ্য,বিশুদ্ধ খোৱা পানীৰ অভাৱত ভুগিছে বন্যাৰ্তই | ইফালে ধনশিৰি মহকুমা প্ৰশাসনে এইপৰ্যন্ত কোনো সাহায্য প্ৰদান কৰা নাই বুলি অভিযোগ উত্থাপন কৰিছে বন্যাৰ্তই |