গোলাঘাট,7 আগষ্টঃ উন্নয়নে ঢুকি নোপোৱা গোলাঘাটৰ সৰপথাৰৰ এটা অঞ্চল ৷ যাতায়তৰ সু-ব্যৱস্থা নথকাৰ বাবে চিকিৎসাৰ অভাৱতে প্ৰাণ হেৰুৱালে ৰোগীয়ে ৷ উল্লেখ্য যে, গোলাঘাট জিলাৰ ধনশিৰি মহকুমাৰ অন্তৰ্গত টেঙানীলৈ যাবলৈ পাৰ হ’ব লাগে ধনশিৰি নৈখন ৷ নৈৰ ওপৰত নাই কোনো দলঙৰ ব্যৱস্থা, যাৰ বাবে নাৱেৰেই নৈ পাৰ হ’ব লাগে অঞ্চলটোৰ ৰাইজে ৷
বৃহস্পতিবাৰে অঞ্চলটোৰ ঠগিৰাম বৰি নামৰ ৩৮ বছৰীয়া এগৰাকী ব্যক্তি অসুস্থ হৈ পৰাত এম্বুলেঞ্চক খবৰ দিয়া হয় যদিও নৈখনৰ বাবে 39 নং ৰাষ্ট্ৰীয় ঘাইপথতে ৰৈ থাকিবলগীয়া হয় এম্বুলেঞ্চ ৷ টুলুঙা নাঁৱেৰে তেখেতক নৈ পাৰ কৰি এম্বুলেঞ্চলৈ অনা হয় যদিও তেতিয়ালৈ মৃত্যুক সাৱটি লয় লোকজনে ৷
ধনশিৰিৰ ওপৰত দলঙৰ অভাৱ বৃহত্তৰ টেঙানী অঞ্চলৰ ৰাইজৰ দীৰ্ঘদিনীয়া এক সমস্যা ৷ দলং নিৰ্মাণৰ বাবে চৰকাৰৰ ওচৰত বহু আবেদন নিবেদন কৰিও কোনো সুফল লাভ কৰা নাই অঞ্চলটোৰ ৰাইজে ৷ বৃহস্পতিবাৰৰ এই ঘটনাই শোকস্তব্ধ কৰি তুলিছে স্থানীয় ৰাইজক ৷ ভৱিষ্যতে যাতে এনে ঘটনাৰ পুনৰাবৃত্তি নহয় তাৰবাবে চৰকাৰক দৃষ্টি নিক্ষেপ কৰিবলৈ আহ্বান জনাইছে ৰাইজে ৷
