গোলাঘাট,১১জুন: গোলাঘাট সদৰ আৰক্ষী থানাত মৃত সন্তানৰ ফটো বুকুত সাৱতি দুৰ্ভগীয়া মাতৃৰ হিয়াভগা কান্দোন । 23 বছৰীয়া সন্তানক হেৰুৱাই এতিয়া ন্যায়ৰ আশাত আৰক্ষীৰ ওচৰ চাপিছে দুৰ্ভগীয়া মাতৃয়ে ।
ঘটনা অনুসৰি, দেওবাৰে গোলাঘাট নগৰৰ চাণ্ডমাৰীৰ সঞ্জীৱ গোস্বামী নামৰ এজন যুৱকৰ মৃত্যু হৈছিল জ্যোতি নগৰৰ 'জজ' নামৰ এটা ড্ৰাগছৰ ঘাটিত । দীৰ্ঘদিন ধৰি সঞ্জীৱে ড্ৰাগছৰ ঘাটিটোত সেৱণ কৰি আহিছিল ড্ৰাগছ । এই ড্ৰাগছ সেৱণ কৰাৰ ফলত সঞ্জীৱৰ স্বাস্থ্যৰ অৱনতি ঘটাত মাতৃয়ে বহু কষ্টেৰে গুৱাহাটীত চিকিৎসা কৰাই সুস্থ কৰি তুলিছিল । সুস্থ হৈ সঞ্জীৱ ঘৰলৈ উভতি অহাৰ পাছত ড্ৰাগছৰ ঘাটিত বন্ধকত থৈ অহা মোবাইল ফোনটো আনিবলৈ গৈছিল । কিন্তু বন্ধকৰ মোবাইল বিচাৰি যোৱা সঞ্জীৱক ড্ৰাগছ ঘাটিটোৰ ব্যৱসায়ী জজ আৰু তেওঁৰ ভাতৃয়ে গুৰুতৰ ভাৱে প্ৰহাৰ কৰাত যুৱকজনে মৃত্যু হয় বুলি অভিযোগ উত্থপন কৰে যুৱকজনৰ মাতৃয়ে । ইফালে, যুৱকজনৰ মৃতদেহটো এখন ৰিক্সাত চিকিৎসালয়লৈ অনা হয় বুলি মাতৃয়ে মন্তব্য কৰে । এই ঘটনাৰ পাছতে মংগলবাৰে পুত্ৰৰ ন্যায় বিচাৰি মাতৃ ৰুনু গোস্বামীয়ে মৃত সন্তানৰ ফটো বুকুত সাৱতি কান্দি-কান্দি গোলাঘাট সদৰ আৰক্ষী থানাত উপস্থিত হয় । মাতৃৰ অভিযোগ অনুসৰি আৰক্ষী অধীক্ষক পুস্পৰাজ সিঙে গোলাঘাটৰ বহু ড্ৰাগছৰ ঘাটিত চলাই অভিযান । এই অভিযানত আৰক্ষীৰ জালত পৰে বহুকেইটা ড্ৰাগছ ব্যৱসায়ী । ড্ৰাগছ ব্যৱসায়ীকেইটা দীপজ্যোতি সিংহ, সমীৰ আহমেদ, ৱাহিদ আলি, আমান চাহু, বিজয় ৰবিদাস, আব্দুল কাদিৰ আৰু আব্দুল ৰাজীৱ বুলি জানিব পৰা গৈছে । কিন্তু কুখ্যাত ড্ৰাগছ মাফিয়া তথা সঞ্জীৱ হত্যাৰ অভিযুক্ত জজ বৰ্তমানলৈকে পলাতক । আৰক্ষীয়ে জজৰ ভাতৃ অকণি আৰু জীবন গগৈক ইতিমধ্যে আটক কৰিছে ।
