গোলাঘাট,25 ডিচেম্বৰ : ৰাজ্যৰ জিলাই জিলাই চলিছে কংগ্ৰেছৰ গৰাখহনীয়া ৷ ইখনৰ পাচত সিখন জিলা কংগ্ৰেছৰ নেতাই কৰিছে দল ত্যাগ ৷ শেহতীয়াভাৱে অজন্তা নেওগ আৰু বুধবাৰে অসম প্ৰদেশ কংগ্ৰেছ সমিতিৰ সম্পাদক পলাশ তামুলীয়ে পদত্যাগ কৰে কংগ্ৰেছ দলৰ পৰা ৷ গোলাঘাট জিলা কংগ্ৰেছৰ প্ৰশাসনিক সম্পাদক তপন দত্তৰ লগতে ১৩ গৰাকী কংগ্ৰেছৰ বিষয় ববীয়াই পদত্যাগ কৰাৰ বাতৰি প্ৰচাৰ হোৱাৰ পাচতে গোলাঘাট কংগ্ৰেছে মুখ খুলিছে ৷ একাংশ কংগ্ৰেছী নেতাৰ মতে, দল ত্যাগে কোনো প্ৰভাৱ নেপেলাই কংগ্ৰেছত ৷ গোলাঘাটত কংগ্ৰেছৰ কোনোধৰণৰ গৰাখহনীয়া হোৱা নাই ৷ যি সকলে পদত্যাগ কৰিছে সেইসকলৰ নিজৰ ৱাৰ্ডতে গণভিত্তি নাই ৷ গোলাঘাট কংগ্ৰেছৰ বাবে তেওঁলোক কুমজেলেকুৱাহে ৷
বর্তমানৰ কংগ্ৰেছী নেতাসকলৰ মতে, গোলাঘাটত ১৪ গৰাকী কংগ্ৰেছীয়ে পদত্যাগ কৰা নাই, মাত্ৰ দুজনেহে পদত্যাগ কৰিছে ৷ গোলাঘাট জিলা কংগ্ৰেছত প্ৰশাসনিক সম্পাদক নামেৰে কোনো পদবী নাই ৷ যদি সঁচাকৈয়ে পদত্যাগ কৰিছে তেন্তে শীঘ্ৰে তেওঁলোকৰ তালিকা প্ৰকাশ কৰিবলৈ দাবী জনাইছে কংগ্ৰেছী নেতা সকলে ৷ অসম প্ৰদেশ কংগ্ৰেছ কমিটিত পলাশ তামুলীৰ দৰে এশজন সম্পাদক আছে, অজন্তা নেওগৰ কৃপাত অসম প্ৰদেশ কংগ্ৰেছ কমিটিৰ সম্পাদক হৈছিল তেওঁ ৷ গণভিত্তি নথকা এইসকল নেতাই কংগ্ৰেছৰ পৰা পদত্যাগ কৰিলে কংগ্ৰেছৰ কোনোধৰণৰ ক্ষতি নহয় বুলিও মন্তব্য কৰে কংগ্ৰেছী নেতা সকলে ৷
লগতে পঢ়ক: বিজেপিলৈ যাবনে অজন্তা : আজিৰ ভিতৰত উত্তৰ লাগে প্ৰদেশ কংগ্ৰেছক
