দেৰগাঁও, ১৬ নৱেম্বৰঃ ছ'চিয়েল মিডিয়াত ভগৱান শ্ৰীকৃষ্ণক ষাঁড় গৰুৰে তুলনা এজন প্ৰাক্তন উপাধ্যক্ষৰ ৷ ভগৱান শ্ৰীকৃষ্ণক ছ'চিয়েল মিডিয়াত ষাঁড় গৰুৰে সৈতে তুলনা কৰি বিপদত পৰিল যুগল নাথ । দেৰগাঁও থানাত বিশ্বহিন্দু পৰিষদে গোচৰ ৰুজু কৰিলে প্ৰাক্তন উপাধ্যক্ষৰ বিৰুদ্ধে ।
উল্লেখ্য যে, গোলাঘাট জিলাৰ দেৰগাঁও কমল দুৱৰা মহাবিদ্যালয়ৰ অৱসৰপ্ৰাপ্ত উপাধ্যক্ষ যুগল নাথৰ বিৰুদ্ধে বিশ্ব হিন্দু পৰিষদ গোলাঘাট জিলা আৰু দেৰগাঁৱৰ একাংশ সচেতন ৰাইজে দেৰগাঁও থানাত ৰুজু কৰিছে গোচৰ ৷ ভগৱান শ্ৰীকৃষ্ণক ষাঁড় গৰুৰ লগত তুলনা কৰি ফেচবুকত বিকৃত প'ষ্ট প্ৰদান কৰাৰ অভিযোগত গোচৰ ৰুজু কৰিছে সংগঠনটোয়ে । বিশ্বহিন্দু পৰিষদ গোলাঘাট জিলা সমিতিৰ সম্পাদক অভিজিৎ বৰাই কয় যে, ধৰ্মীয় অনুভূতিত আঘাত হানি ছ'চিয়েল মিডিয়াত অপপ্ৰচাৰ চলোৱাৰ বাবেই উপাধ্যক্ষ গৰাকীৰ বিৰুদ্ধে গোচৰ নম্বৰ- 808/19 u/s-153 ITC ,67 IT গোচৰ তৰা হয় ।
কোনো কাৰণতে হিন্দু ধৰ্মৰ উপাস্য দেৱ-দেৱীক লৈ তুচ্ছ তাচিল্য মন্তব্য সহ্য নকৰে বুলি সংগঠনটোৰ সম্পাদক অভিজিৎ বৰাই এক বিবৃতি যোগে স্পষ্ট কৰি দিয়ে । লগতে গোলাঘাট জিলা আৰক্ষী আৰু প্ৰশাসনক শীঘ্ৰে ব্যৱস্থা গ্ৰহনৰ বাবে দাবী উত্থাপন কৰে । আনহাতে, দেৰগাঁও আৰক্ষীয়ে অধিক তথ্যৰ বাবে তদন্ত আৰম্ভ কৰিছে বুলি জানিব পৰা গৈছে । এই বিতৰ্কিত প'ষ্টটোক কেন্দ্ৰ কৰি দেৰগাঁৱত তীব্ৰ প্ৰতিক্ৰিয়াৰ সৃষ্টি হৈছে ।
