ধুবুৰী, 7 আগষ্টঃ মহাবাহু ব্ৰহ্মপুত্ৰৰ নৈ কাষৰীয়া অঞ্চলত গৰাখহনীয়াৰ ভয়ংকৰ তাণ্ডৱলীলা ৷ ধুবুৰী আৰু গোৱালপাৰাৰ সীমান্তৱৰ্তী তথা বিলাসীপাৰা পশ্চিম সমষ্টিৰ সমীপৰ মনকোলা-চাইলধৰা গাঁও পঞ্চায়ত কাৰ্যালয় গ্ৰাস কৰিছে বৰলুইতৰ খহনীয়াই। লগতে গাঁও পঞ্চায়তৰ প্ৰায় 10 খন কৈ গাঁৱৰ বাসিন্দাৰ নিন্দ্ৰা হৰণ কৰিছে বৰলুইতৰ খহনীয়াই ৷ বিগত কেইটা দিনত পঞ্চায়তখনৰ অধীনস্থ চেঙেৰ আলগা,বাঘপাৰা,দিনেৰ আলগা,ৰায়চান্দ,ঘুনীমাৰী,পাটাকাটা,ফুলকাকাটা আৰু কামিনীৰ ভিটা গাঁও কেইখনৰ বহু কেইটা পৰিয়ালৰ বাসগৃহ নদী খনৰ খহনীয়াত জাহ গৈছে। যাৰ ফলত শংকিত হৈ পৰিছে অঞ্চলবাসী ৷
আনহাতে,গোলাঘাটৰ সৰুপথাৰ বিধান সমষ্টিৰ অন্তৰ্গত উৰিয়ামঘাটত ৰেংমা নদীৰ গৰাখহনীয়াই তীব্ৰ ৰূপ ধাৰণ কৰিছে ৷ উৰিয়ামঘাটৰ হাতিডুবিত গড়কাপ্তানী পকী পথ ছিঙিছে ৰেংমা নদীৰ গৰাখহনীয়াই | ফলত ঘোলাপানী হালধিবাৰী,দেবীপুৰ আদি অৰ্ধশতাধিক গাৱৰ বৰ্হিঃৰাজ্যৰ লগত যোগাযোগ বিছিন্ন হৈছে | ৰেংমা নদীৰ গৰাখহনীয়া ৰোধৰ কাৰণে চৰকাৰৰ ওচৰত আবেদন-নিবেদন কৰিও কোনো সুফল পোৱা নাই নৈপৰীয়া ৰাইজে | অসমৰ জলসম্পদ বিভাগৰ কোনো বিষয়া কৰ্মচাৰীয়ে বৰ্তমান পৰ্যন্ত অঞ্চলটোত উপস্থিত নহোৱাত ক্ষোভ উজাৰিছে স্থানীয় ৰাইজে ৷
