গোলাঘাট, 3 অক্টোবৰঃ গোলাঘাটত অব্যাহত আছে হাতী মানুহৰ সংগ্ৰাম ৷ জিলাখনৰ মুৰফুলনীত বজাৰ গৃহ ভাঙি তহিলং কৰিলে বন্যহস্তীৰ এটা বৃহৎ জাকে ।
এতিয়া দিনে নিশাই নুমলীগড়ত চলিছে বন্যহস্তীৰ উপদ্ৰৱ । দৈনিক জাকে জাকে বন্যহস্তী জনাঞ্চলত প্ৰৱেশ কৰি আতংকৰ সৃষ্টি কৰিছে । বুধবাৰেও এটা বৃহৎ হাতীৰ জাকে ভাঙি তহিলং কৰিলে মুৰফুলনীৰ কেইবাটাও বজাৰগৃহ । ইপিনে নিশাটো বাদেই দিন দুপৰতে মানুহৰ বাৰী আৰু চাহ বাগিছাত জাকে জাকে বন্যহস্তীয়ে আশ্ৰয় লৈ থাকে বুলি স্থানীয় ৰাইজে জানিবলৈ দিয়ে । অৱশেষত ৰাইজে হাতে হাতে জুই, বম, ফটকা লৈ নিজৰ ঘৰখন আৰু খেতি পথাৰখন পহৰা দিব লগীয়া হৈছে ৷ স্থানীয় লোকসকলে হাতী খেদিবলৈ চেষ্টা কৰিও বিফল হয় বুলি তেওঁলোকে জানিবলৈ দিয়ে । এনেদৰে এতিয়া গোলাঘাটত হাতী-মানুহৰ সংঘাতে ভয়াৱহ ৰূপ লৈছে । ইফালে ৰাইজৰ অভিযোগ অনুসৰি বন বিভাগৰ লোকক খবৰ দিয়াৰ পিচতো বনকৰ্মীয়ে হাতী খেদিবলৈ গাঁও খনত উপস্থিত নহ'ল । সেয়ে স্থানীয় লোকে বন বিভাগৰ ওপৰত তীব্ৰ ক্ষোভ উজাৰে ।
