গোলাঘাট, ৬ মাৰ্চ: গোলাঘাট আৰু যোৰহাট জিলাত বিষাক্ত চুলাই মদ সেৱন কৰি প্ৰায় ডেৰ শতাধিক লোকৰ মৃত্যু হৈছিল। ইয়াৰে সৰ্বাধিক মৃত্যু হৈছিল শালমৰা চাহ বাগিচাত। বিষাক্ত মদ সেৱনৰ ফলত নিঠৰুৱা হৈছিল একো একোটা পৰিয়াল। ঘাতমাউৰা হৈছিল বহু কণ কণ ল'ৰা ছোৱালী ।
এই বিষাক্ত চুলাই মদে চিৰদিনৰ বাবে পিতৃ মাতৃক আতৰাইছিল বহু কেইটা পৰিয়ালৰ। ইয়াকে লৈ ৰাজ্য চৰকাৰৰ ৰাজ্যিক শিশু সুৰক্ষা আয়োগে পদক্ষেপ গ্ৰহণ কৰিবলৈ আগবাঢ়ি আহিছে। গুৱাহাটীৰ পৰা অহা এটা দলে গোলাঘাট প্ৰশাসনৰ সহযোগত শালমাৰা, উষা গৰঙা, তেলীশাল আদি অঞ্চল পৰিভ্ৰমণ কৰি বুজ লৈছে নিঠৰুৱা সন্তান সকলৰ। পৰিয়ালৰ লগতে আলোচনাত মিলিত হৈছে ৰাইজৰ লগত। ৰাজ্য চৰকাৰৰ ৰাজ্যিক শিশু সুৰক্ষা আয়োগৰ অধ্যক্ষৰ লগত অঞ্চল সমূহ পৰিভ্ৰমণ কৰে ডঃ পিলু হাজৰিকা, ৰূপা হাজৰিকা, লুকুমণি গোস্বামী । অনাথ শিশু সকলক অতিশীঘ্ৰে সংস্থাপনৰ ব্যৱস্থা গ্ৰহণ কৰা হ'ব বুলি জনাই সূনীতা চাংকাকতিয়ে ।
