খুমটাই, 26 মে': ভয়ংকৰ বতাহ বৰষুণৰ ফলত খুমটাইৰ বুটলিখোৱাত উভালি পৰিল প্ৰকাণ্ড গছ । ইয়াৰ ফলত সম্পূৰ্ণৰূপে ক্ষতিগ্ৰস্ত হয় বুটলিখোৱাৰ ৰমেশ বড়োৰ বাসগৃহ ৷ ইপিনে দুৰ্ঘটনাৰ সময়ত বাসগৃহৰ ভিতৰতে আছিল পৰিয়ালৰ সকলো সদস্য ৷ ঘটনাৰ কথা জানিব পাৰি স্থানীয় ৰাইজে ততাতৈয়াকৈ সকলো সদস্যক সুৰক্ষিত অৱস্থাত উদ্ধাৰ কৰে যদিও ৰুণুমাই বড়োক স্থানীয় চিকিৎসালয়লৈ প্ৰেৰণ কৰে । এই দুৰ্ঘটনাৰ ফলত বন্ধ হৈ পৰে ধোদৰ আলি ।
ভয়ংকৰ বতাহ বৰষুণৰ ফলত বিস্তৰ ক্ষতি খুমটাই বুটলিখোৱাত
ইতিমধ্যে গোলাঘাট পুলিচ প্ৰশাসন আৰু গোলাঘাট SDRFৰ দল আহি প্ৰকাণ্ড গছ জোপা ৰাস্তাৰ পৰা আতঁৰোৱাৰ ব্যৱস্থা কৰে । ভয়ংকৰ ধুমুহাই খুমটাই, বুটলিখোৱা, শাওতলি, আদি বৃহত্তৰ অঞ্চলৰো ক্ষতি সাধন কৰে ৷ উল্লেখ্য যে, ইয়াৰ ফলত অঞ্চলটোত ব্যাহত হৈ পৰিছে বিদ্যুৎ সংযোগ ব্যৱস্থা ৷
