গোলাঘাট, 1জুন : ক’ৰণাৰ দ্বিতীয়টো লহৰে সমগ্ৰ ৰাজ্যতে লৈছে ভয়াৱহ ৰূপ । গোলাঘাট জিলাৰ খুমটাইৰ কেইবাখনো বাগিচাৰ অৰ্ধ শতাধিক চাহ শ্ৰমিক ক’ভিডত আক্ৰান্ত হৈ থাকিবলগীয়া হৈছে ক’ভিড কেয়াৰ কেন্দ্ৰত ।
খুমটাইত আৰ্তজনৰ কাষত থিয় হৈ বহুজনে দিছে মহানুভৱতাৰ পৰিচয় ৷ তাৰ মাজতে খুমটাইৰ কেইবাখনো বাগিচাৰ ক’ভিড কেয়াৰ কেন্দ্ৰত চিকিৎসাধীন হৈ থকা শ্ৰমিকক খাদ্য সামগ্ৰী যোগান ধৰিলে আটছাৰ গোলাঘাট শাখাৰ সম্পাদক অনুজ কুৰ্মীয়ে ৷
উল্লেখযোগ্য যে, শাঁওতলী, গৰঙা, নতুনমাটি আৰু বৰফলং বাগিচাৰ ক’ভিড কেয়াৰ চেন্টাৰত থকা আক্ৰান্ত সকলৰ স্বাস্থ্যৰ বুজ লোৱাৰ লগতে ফলমূল, বিস্কুট আদি খাদ্য সামগ্ৰী যোগান ধৰিলে ছাত্ৰনেতা জনে । বিভিন্ন খাদ্য সামগ্ৰীৰ লগতে মাস্ক, চেনিটাইজাৰ বিতৰণ কৰিলে ক’ভিডত আক্ৰান্ত শ্ৰমিক সকলৰ মাজত ।
ক’ভিডৰ জটিল সন্ধিক্ষণত এনেদৰে আৰ্তজনৰ সহায় আগবঢ়াই অনুজ কুৰ্মীয়ে দেখুৱাইছে মানৱীয়তাৰ নিদৰ্শন ৷ অনুজ কুৰ্মীৰ এই কাৰ্যত সহযোগ আগবঢ়াই স্থানীয় আটছাৰ কৰ্মীসকলে ।
লগতে পঢ়কঃ কৰ’ণা গ্ৰাসত ধেমাজিৰ একমাত্ৰ জৈৱিক ক্ষুদ্ৰ চাহ বাগিচা
