গোলাঘাট, 8 এপ্ৰিলঃ "11 এপ্ৰিলৰ আগতে যদি কোনোবাই বিজেপি দলত যোগদান কৰিম বুলি ভাবিছে তেন্তে সোনকালেই যোগদান কৰক, অন্যথা কুম্ভকৰ্ণৰ দৰে শুই থাকক। কংগ্ৰেছে লুঙী, ধূতীৰ ৰাজনীতি কৰিছিল, বিজেপিয়ে সোণৰ ৰাজনীতি কৰিছে"- এই মন্তব্য হিমন্ত বিশ্ব শৰ্মাৰ ৷ 11 নং কলিয়াবৰ লোকসভা সমষ্টিৰ বিজেপি, অগপ, সন্মিলিত গণ শক্তি অসম, বিপিএফ, তিৱা জাতীয় ঐক্য মঞ্চই সোমবাৰে মিত্ৰজোঁটৰ প্ৰাৰ্থী মণি মাধৱ মহন্তৰ হৈ নিৰ্বাচনী প্ৰচাৰত অংশগ্ৰহণ কৰে ৷ মুখ্যমন্ত্ৰী সৰ্বানন্দ সোণোৱালে এই সভাত অংশগ্ৰহণ কৰি অসমত ভৱিষ্যত সময়ত নৱ প্ৰজন্মৰ বাবে এখন ভাল চৰকাৰৰ আহ্বান জনায় ৷
1952 চনৰ পৰায়ে কংগ্ৰেছক ৰাইজে শাসন ভাৰ দি আহিছে। কিন্তু অসম, ভাৰতবৰ্ষৰ উন্নয়নৰ ক্ষেত্ৰত কোনো দৃষ্টান্ত মূলক কাম নকৰিলে কংগ্ৰেছে । যাৰবাবে 2014 চনত ভাৰতৰ জনতায়ে প্ৰধানমন্ত্ৰী হিচাপে নিৰ্বাচিত কৰিলে নৰেন্দ্ৰ মোদীক । প্ৰধানমন্ত্ৰী নৰেন্দ্ৰ মোদীয়ে দায়িত্ব লোৱাৰ পিচতেই প্ৰতিজন কেন্দ্ৰীয় মন্ত্ৰীক পোন্ধৰ দিনৰ মূৰে মূৰে উত্তৰ পূৰ্বাঞ্চল ভ্ৰমণ কৰি উন্নয়নৰ ব্যৱস্থা গ্ৰহণ কৰিবলৈ দায়িত্ব দিছিল । নিজ নিজ বিভাগৰ দায়িত্ব লৈ পাঁচ বছৰতে উত্তৰ পূৰ্বাঞ্চলক উন্নয়নৰ এক ধাৰালৈ আনিলে বিজেপিয়ে ৷ সভাত এই কথা উনুকিয়াই প্ৰাৰ্থী গৰাকীৰ বাবে ভোট আহ্বান কৰে ৷
উক্ত সভাত মুখ্যমন্ত্ৰী সোণোৱাল, মন্ত্ৰী হিমন্ত বিশ্ব আৰু মন্ত্ৰী অতুল বৰাৰ লগতে বহু নেতা উপস্থিত থাকে ৷
