গোলাঘাট , 29 ডিচেম্বৰঃ সদৌ অসম ছাত্ৰ সন্থা, অসম জাতীয়তাবাদী যুৱ ছাত্ৰ পৰিষদ আৰু ৩০ জনগোষ্ঠীয় সংগঠনৰ আহ্বানত আৰু দেৰগাঁও আঞ্চলিক ছাত্ৰ সন্থাৰ উদ্যোগত গোলাঘাটত নাগৰিকত্ব সংশোধনী আইনৰ বিৰুদ্ধে সাব্যস্ত কৰা হয় তীব্ৰ প্ৰতিবাদ ৷ জাতি ধ্বংসী নাগৰিকত্ব সংশোধনী বাতিলৰ দাবীত গোলাঘাট কুৰালগুৰিত ডবা, তাল, উৰুলি দি "জনতাৰ বজ্ৰনিনাদ" কাৰ্যসূচীৰে সংগঠন কেইটাই সাব্যস্ত কৰে তীব্ৰ প্ৰতিবাদ ৷ হাতে হাতে প্লে কাৰ্ড লৈ প্ৰতিবাদত অংশগ্ৰহণ কৰে বৃদ্ধা আই-মাতৃসকলে ৷
উচতনিমূলক বক্তব্য প্ৰদান কৰা বিতৰ্কিত বিধায়ক মৃণাল শইকীয়াৰ মগজুৰ বিকৃতি ঘটিছে বুলি উল্লেখ কৰাৰ লগতে উচতনিমূলক বক্তব্য প্ৰদান বাবে বিধায়কজনক শীঘ্ৰে গ্ৰেপ্তাৰৰো দাবী উত্থাপন কৰে সদৌ অসম ছাত্ৰ সন্থাই ৷ বিধায়ক মৃণাল শইকীয়াই ছাত্ৰ সন্থা কৰি থকা অৱস্থাত "সূৰ্য তেজৰ অন্য এট নাম" নামৰ বোলছবিখন নিৰ্মাণ কৰাৰ নামত ধন দাবী কৰি গ্ৰেপ্তাৰ হৈছিল আৰু তেওঁক মুকলি কৰিবৰ বাবে ছাত্র সন্থাই আন্দোলন কৰিব লগা হৈছিল ।
বিধায়ক মৃণাল শইকীয়াক অতীতক পাহৰি নাযাবলৈ আহ্বান জনায় আছু নেতা মনোৱাৰ হুছেইনে । লগতে, মৃণাল শইকীয়া আৰু তেওঁৰ সহযোগীৰ বিৰুদ্ধে গোলাঘাটৰ বিজুলী বনাঞ্চল কাটি ধ্বংস কৰাৰো অভিযোগ উত্থাপন কৰে আছু নেতাগৰাকীয়ে । প্ৰতিবাদী কাৰ্যসূচীত কন্ঠশিল্পী নীল আকাশ দাসে অংশগ্ৰহণ কৰি নাগৰিকত্ব সংশোধনী আইন বাতিলৰ দাবী জনায় ।
লগতে পঢ়কঃনলবাৰীত খিলঞ্জীয়াৰ গণ হুংকাৰ
