খুমটাই, 5 আগষ্ট: সুদীৰ্ঘ 27 বছৰে বিনা বেতনে জ্ঞানৰ জেউতি বিলাই অৱশেষত নিয়তিৰ ওচৰত হাৰ মানিলে এগৰাকী শিক্ষকে ৷ খুমটাইৰ শাঁওতলীৰ বিশিষ্ট সমাজ কৰ্মী তথা শিক্ষক ইনাৰাম কুৰ্মীয়ে আৰ্থিক অভাৱৰ বাবে চিকিৎসা কৰি নোৱাৰাৰ বাবেই, অৱশেষত হাৰ মানিলে মৃত্যুৰ ওচৰত ৷ বৃহত্তৰ চাহ জনজাতি অধ্যুষিত অঞ্চল শাঁওতলীৰ শিক্ষাৰ কেন্দ্ৰস্বৰূপ, শাঁওতলী পুৰণিমাটি চাহ বাগিচা মধ্য ইংৰাজী বিদ্যালয় প্ৰতিষ্ঠা হোৱা দিনৰে পৰাই, বিনা বেতনে সেৱা আগবঢ়াই আহিছিল সদ্য প্ৰয়াত শিক্ষকগৰাকীয়ে ৷
১৯৯৩ চনতে প্ৰতিষ্ঠা হোৱা বিদ্যালয়খন ২০০৫ চনত চৰকাৰে স্বীকৃতি প্ৰদান কৰিছিল যদিও, আজি পৰ্যন্ত প্ৰাদেশিকীকৰণ নহ'ল বিদ্যালয় খন ৷ নিজৰ সমগ্ৰ জীৱনত শিক্ষাৰ পোহৰ বিলাই যোৱা শিক্ষকগৰাকীয়ে শেষ নিশ্বাস ত্যাগ কৰা দিন পৰ্যন্ত নাপালে চৰকাৰৰ পৰা কোনো প্ৰাপ্য ধন ৷ যাৰ বাবে উন্নত চিকিৎসাৰ অভাৱত তেওঁ অৱশেষত মৃত্যুক আঁকোৱালি ল'বলগীয়া হয় ৷ বিগত দুটা বছৰে গুৰুতৰভাৱে অসুস্থ হৈ আছিল শিক্ষকগৰাকী ৷ শিক্ষকগৰাকীৰ মৃত্যুত চৰকাৰৰ বিৰুদ্ধে ক্ষোভ প্ৰকাশ কৰিলে তেওঁৰ প্ৰাক্তন শিক্ষাৰ্থী সকলে ৷
সকলো বিনা বেতনে কাম কৰা শিক্ষকৰ ক্ষেত্ৰত চৰকাৰে বিহীত ব্যৱস্থা কৰিব লাগে বুলি আহ্বান জনায় তেওঁৰ ছাত্ৰ সকলে ৷ এনে নকৰিলে অনাগত দিনবোৰতো বহু শিক্ষক এনে পৰিস্থিতিৰ সন্মুখীন হ'বলগীয়া হ'ব বুলি উল্লেখ কৰে তেওঁলোকে ৷ লগতে সদ্যপ্ৰয়াত শিক্ষক গৰাকীৰ পৰিয়ালক এককালীন সাহায্য প্ৰদান কৰিবলৈয়ো চৰকাৰক আহ্বান জনায় ক্ষুব্ধ প্ৰাক্তন শিক্ষাৰ্থী সকলে ৷
উল্লেখ্য যে, অজস্ৰ ছাত্ৰ-ছাত্ৰীক শিক্ষাৰ পোহৰ বিলোৱা শিক্ষকগৰাকীৰ নিজ কন্যাই আৰ্থিক অনাটনৰ বাবে, স্নাতক 2য় ষান্মাসিকত আধাতে সামৰিবলগীয়া হয় নিজৰ শিক্ষা জীৱন ৷ শিক্ষকগৰাকীৰ মৃত্যুৰ পাচত এতিয়া অনিশ্চিত ভৱিষ্যতৰ দিশে গতি কৰিছে তেওঁৰ পত্নী, কন্যা আৰু ৫ বছৰীয়া এটি পুত্ৰ সন্তানেৰে ভৰা পৰিয়ালটো ৷
লগতে পঢ়ক: নতুন শিক্ষা নীতি ৰূপায়নৰ পূৰ্বে বড়ো মাধ্যমৰ সমস্য়া সমাধানৰ দাবী এবছুৰ
