গোৱালপাৰা, 12 জুন: ৰংগেশ্বৰী পামগাঁৱত ৰাইজৰ অভিনৱ প্ৰতিবাদ ৷ গাওঁখনৰ একাংশ পুৰুষ মহিলাই পথত ভূঁই ৰুই, মাছ ধৰি সাব্যস্ত কৰিলে প্ৰতিবাদ । গোৱালপাৰা জিলাৰ সীমামূৰীয়া অঞ্চল নগৰবেৰাৰ জলজলী নদীৰ পাৰঘাটৰ পৰা টুপামাৰীলৈ যোৱা এক মাত্ৰ ব্যস্ত পথটোৰে নিতৌ শ শ পথচাৰীয়ে অহা যোৱা কৰাৰ লগতে বাইক আৰোহী, বিভিন্ন সৰু বৰ যান-বাহন চলাচল কৰে ।
কিন্তু, বাৰিষাৰ পূৰ্বে পথচোৱাৰ অৱস্থা পুতৌজনক হৈ পৰি উক্ত পথটো পথৰ পৰিৱৰ্তে পানী অহা যোৱা কৰা নলা নৰ্দমাৰ দৰে দেখা গৈছে ৷ যাৰ বাবে দীৰ্ঘদিন ধৰি জীয়াতু ভুগি আহিবলগীয়া হৈছে স্থানীয় ৰাইজে ৷ উল্লেখ্য যে, ৰাইজৰ প্ৰৱল দাবীত পথছোৱা নিৰ্মাণৰ বাবে ২০২০-২১ বৰ্ষত এম জি এনৰেগাৰ আচঁনিৰ অধীনত ছমৰীয়া উন্নয়ণ খণ্ডৰ ভখুৰাদিয়া ৰংগেশ্বৰী গাঁও পঞ্চায়তৰ জৰিয়তে ৬,৭৩,৩৬১ টকা আৱন্টন দিয়া হয় ।
কিন্তু অভিযোগ অনুসৰি, পঞ্চায়তটোৰ সভানেত্ৰীগৰাকীয়ে ব্যাপক দুৰ্নীতি তথা অনিয়ম সংঘটিত কৰি পথটোৰ নিৰ্মাণ কাৰ্য আধাতে শেষ কৰাত গাঁওখনৰ সৰ্বসাধাৰণ ৰাইজে একাঁঠু বোকাময় পথৰে নৰক যন্ত্ৰনা ভোগ কৰি যাতায়ত কৰিবলগীয়া হৈছে ।
