গোৱালপাৰা, ১৫ নৱেম্বৰ : গোৱালপাৰাত সোমবাৰে সাংসদ গৌৰৱ গগৈয়ে প্ৰয়াত মুখ্যমন্ত্ৰী তৰুণ গগৈৰ এটা অৱক্ষ মূৰ্তি উন্মোচন কৰে ৷ গোৱালপাৰা জিলাৰ পূব বিধানসভা সমষ্টিৰ বিধায়ক এ কে ৰছিদ আলমৰ একক প্ৰচেষ্টাত নিৰ্মাণ কৰা হৈছে এই প্ৰতিমূৰ্তিটো ৷ প্ৰয়াত মুখ্যমন্ত্ৰীৰ অৱক্ষ মূৰ্তি উন্মোচনৰ উপলক্ষে গোৱালপাৰাৰ ৰাজীৱ ভৱনত এখন ৰাজহুৱা সভা অনুষ্ঠিত কৰা হয় ।
সভাত সাংসদ গৌৰৱ গগৈৰ লগতে কংগ্ৰেছৰ বিধায়িনী দলৰ উপ-দলপতি ৰকিবুল হুছেইন, বিধায়ক যাদৱ স্বৰ্গীয়াৰী, বিধায়ক এ কে ৰছিদ আলম, কংগ্ৰেছ নেতা মানস বৰা, শান্তনু বৰা আৰু গোৱালপাৰা জিলা পৰিষদৰ সভানেত্ৰী ডেমজিয়া মাৰাক উপস্থিত থাকে । প্ৰয়াত মুখ্যমন্ত্ৰীৰ প্ৰতিমূৰ্তি উন্মোচনৰ পাছত সাংসদ গৌৰৱ গগৈয়ে পিতৃ তথা প্ৰয়াত মুখ্যমন্ত্ৰী তৰুণ গগৈৰ কৰ্মৰ কিছু খতিয়ান দাঙি ধৰে ।
সভাত ভাষণ প্ৰদান কৰি কংগ্ৰেছৰ বিধায়িনী দলৰ উপ-দলপতি ৰকিবুল হুছেইনে মুখ্যমন্ত্ৰী হিমন্ত বিশ্ব শৰ্মাক বিধায়ক চোৰ আখ্যা দিয়ে ৷ তেওঁ লগতে জাতি-জনগোষ্ঠীৰ মাজত বিভাজনৰ সৃষ্টি কৰাৰ লগতে অত্যাধিক মূল্যবৃদ্ধিৰ বাবে বিজেপি চৰকাৰক কটাক্ষ কৰে ৷ তেওঁ লগতে জনজাতিকৰণৰ নামত ছয় জনগোষ্ঠীক প্ৰতাৰণা কৰি মিথ্যা জনজাতিৰ প্ৰেমেৰে অভিলেখ গঢ়া বৰ্তমানৰ চৰকাৰখনে জনজাতিৰ বাবে মুখ্যমন্ত্ৰীৰ পদটো কিয় সংৰক্ষণ কৰিব নোৱাৰে বুলি কটাক্ষ কৰে ।
লগতে পঢ়ক : পুনৰ বিজেপিক কটাক্ষ প্ৰদেশ কংগ্ৰেছৰ সভাপতিৰ
