ডিমা হাছাও,২২ মে': বৃহস্পতিবাৰে পুৱা ৮ বজাৰ পৰা অসমৰ ১৪ টাকৈ লোকসভা সমষ্টিত আৰম্ভ হ'ব লোকসভা নিৰ্বাচনৰ ভোট গণনা । ইয়াৰ বাবে সাজু হৈছে ৰাজ্যৰ প্ৰতিখন জিলা প্ৰশাসনৰ নিৰাপত্তা ব্যৱস্থা। হাফলং জিলা উপায়ুক্তৰ কাৰ্যালয়ত সম্পন্ন হ'বলগীয়া ভোট গণনাৰ বাবে তিনিতৰপীয়া নিৰাপত্তা বেষ্টনীৰ ব্যৱস্থা কৰিছে ডিমা হাছাও জিলা প্ৰশাসনে। জিলা উপায়ুক্ত তথা নিৰ্বাচনী বিষয়া অমিতাভ ৰাজখোৱাই নিৰাপত্তাৰ দিশত অধিক গুৰুত্ব দিয়া বুলি কোৱাৰ লগতে কাৰ্যালয়ৰ ২০০ মিটাৰলৈকে তিনিতৰপীয়া নিৰাপত্তা বেষ্টনী গঢ়ি তোলাৰ কথা জানিবলৈ দিয়ে। উপায়ুক্ত কাৰ্যালয়ৰ সন্মুখত ২০০ মিটাৰৰ ভিতৰত যান-বাহন তথা সাধাৰণ মানুহৰ প্ৰৱেশ নিষিদ্ধ কৰা হৈছে।
হাফলং বিধানসভা সমষ্টিৰ পাঁচটা ইভিএমৰ ভিপিপেট গণনা বাধ্যতামূলক কৰা হৈছে । আনহাতে,হাফলং বিধানসভা সমষ্টিৰ ২৪২ টা ভোটগ্ৰহণ কেন্দ্ৰত ১৮ টা ৰাউণ্ডত ভোট গণনা কৰা হ'ব বুলি জানিবলৈ দিয়ে নিৰ্বাচনী বিষয়া অমিতাভ ৰাজখোৱাই।
