বৃহস্পতিবাৰে স্বাক্ষৰিত হ’ব বহু প্ৰত্যাশিত নগা শান্তি চুক্তি

নগা বিদ্ৰোহী সংগঠন এনএচচিএন (আইএম)-ৰ লগত কেন্দ্ৰীয় চৰকাৰৰ শান্তি চুক্তি স্বাক্ষৰিত হ’ব ৷ ইয়াক লৈ সমগ্ৰ উত্তৰ পূৱতে সৃষ্টি হৈছে তীব্ৰ উত্তেজনা ৷ কিন্তু কি আছে নগা শান্তি চুক্তিত সেই কথা আজিও সদৰি কৰা নাই কেন্দ্ৰীয় চৰকাৰে ৷ কিন্তু অসমৰ পাহাৰীয়া জিলা ডিমা হাছাওৰ ভূমি গ্ৰেটাৰ নগালেণ্ডত অন্তৰ্ভুক্ত হোৱাৰ শংকাত চিন্তিত হৈ পৰিছে সাধাৰণ ৰাইজ ৷

ডিমা হাছাও, 30 অক্টোবৰঃ বৃহস্পতিবাৰে স্বাক্ষৰিত হ’ব বহু প্ৰত্যাশিত নগা শান্তি চুক্তি ৷ নগা বিদ্ৰোহী সংগঠন এন এচ চি এন (আইএম)-ৰ লগত কেন্দ্ৰীয় চৰকাৰৰ শান্তি চুক্তি স্বাক্ষৰিত হ’ব ৷ ইয়াক লৈ সমগ্ৰ উত্তৰ পূৱতে সৃষ্টি হৈছে তীব্ৰ উত্তেজনা ৷ কিন্তু কি আছে নগা শান্তি চুক্তিত সেই কথা আজিও সদৰি কৰা নাই কেন্দ্ৰীয় চৰকাৰে ৷ কিন্তু অসমৰ পাহাৰীয়া জিলা ডিমা হাছাওৰ ভূমি গ্ৰেটাৰ নগালেণ্ডত অন্তৰ্ভুক্ত হোৱাৰ শংকাত চিন্তিত হৈ পৰিছে সাধাৰণ ৰাইজ ৷ এন এচ চি এন (আইএম)-ৰ লগত শান্তি চুক্তিৰ ফলত ডিমা হাছাও জিলাৰ অখণ্ডতাত যাতে কোনো ধৰণৰ প্ৰভাৱ নপৰে এই দাবী জনায়ছে ডিমা হাছাও জিলা কংগ্ৰেছে ৷

আজি হাফলং ৰাজীৱ ভৱনত এখন সংবাদমেল সম্বোধন কৰি ডিমা হাছাও জিলা কংগ্ৰেছৰ সভাপতি নিৰ্মল লাংথাচাই কয় যে, নগা শান্তি চুক্তিত কি আছে সেয়া এতিয়াও স্পষ্ট কৰা নাই কেন্দ্ৰীয় চৰকাৰে । ডিমা হাছাও জিলাৰ ভূমি নগালেণ্ডত অন্তর্ভূক্ত হোৱাক লৈ শংকিত হৈ পৰিছে ৰাইজ । সংবাদমেলৰ যোগেদি কংগ্ৰেছ সভাপতি গৰাকীয়ে আৰু কয় যে, কেন্দ্ৰীয় চৰকাৰ লগত কাইলৈ এনএচচিএন (আইএম)-ৰ যি শান্তি চুক্তি স্বাক্ষৰ হ’ব এই শান্তি চুক্তিক আদৰণি জনাইছে ডিমা হাছাও জিলা কংগ্ৰেছে ৷ তেখতে লগতে কয় যে, 'ডিমা হাছাও জিলাত 13 টা বিভিন্ন জাতি জনগোষ্ঠী দীৰ্ঘদিনৰে পৰা একেলগতে বসবাস কৰি আহিছে । এই শান্তি চুক্তিৰ দ্বাৰা যাতে এইসমূহ জাতি জনগোষ্ঠীৰ মাজত কোন অৱস্থাতে ভুল বুজাবুজিৰ সৃষ্টি নহয় ইয়াৰ প্ৰতি কেন্দ্ৰীয় আৰু ৰাজ্য চৰকাৰৰ লক্ষ্য ৰখা উচিত ৷'