ডিমা হাছাও, 24 জানুৱাৰী : ডিমাছা নেশ্যনেল আৰ্মি (ডি এন এল এ) উগ্ৰপন্থী সংগঠনে 24 ঘণ্টা ডিমা হাছাও জিলা বন্ধ ঘোষণা কৰে। ডিমাছা শ্বহীদ দিৱস হিচাপে উগ্ৰপন্থী সংগঠনটোৰ প্ৰচাৰ সচিব ৰিংসমাই ডিমাছাই এক প্ৰেছ বিবৃত্তিত 24 ঘন্টীয়া বন্ধৰ উল্লেখ কৰে ৷ নগা শান্তি চুক্তিত ডিমা হাছাও জিলাৰ ভূমি নাগালেণ্ডত অন্তৰ্ভুক্ত হোৱাৰ খবৰৰ পিছত যোৱা 2018 চনত মাইবং ৰেল ষ্টেচনত আন্দোলনৰত অৱস্থাত আৰক্ষীৰ গুলিত নিহত হৈছিল প্ৰৱন্ত হাকমোকচা আৰু মিথুন ডিব্ৰুগেডে ৷ যাৰ ফলত 25 জানুৱাৰী দিনটোক শ্বহীদ দিৱস হিচাপে ঘোষণা কৰি 24 ঘণ্টাৰ ডিমা হাছাও জিলা বন্ধৰ আহ্বান কৰে উগ্ৰপন্থী সংগঠনটোৱে । ইয়াৰ উপৰি উগ্ৰপন্থী সংগঠনটোৰ মতে ডিমা হাছাও কোনো ডাম্পিং গ্ৰাউণ্ড নহয় য'ত ডিটেনচন কেম্প স্থাপন কৰা হ'ব। ডিমা হাছাও জিলাত ডিটেনচন কেম্প স্থাপনৰ তীব্ৰ বিৰোধিতা কৰি ডিটেনচন কেম্পৰ সলনি পাহাৰীয়া জিলাখনত শিক্ষা প্ৰতিষ্ঠানৰ স্থাপন জৰুৰী বুলি উল্লেখ কৰি ৰিংসমাই ডিমাছাই ডিমা হাছাও জিলাত পঞ্চায়ত ৰাজ প্ৰৱৰ্তনৰ সিদ্ধান্তৰ তীব্ৰ বিৰোধিতা কৰে ।
