ডিমা হাছাও, 11 এপ্ৰিল : ডিমা হাছাও জিলাত শনিবাৰে পুনৰ দুগৰাকী লোকৰ দেহত ধৰা পৰে ক’ৰণা ভাইৰাছৰ অৱস্থিতি । ডিমা হাচাও স্বাস্থ্য আৰু পৰিয়াল কল্যাণ বিভাগৰ যুটীয়া সঞ্চালিক ডাঃ দিপালী বৰ্মনে জানিবলৈ দিয়ে এই কথা । শুকুৰবাৰ 4 গৰাকী ব্যক্তি ক’ৰণাত আক্ৰান্ত হৈছিল ৷ ইয়াৰ পাছতে শনিবাৰে পুনৰ ৰেপিড এন্টিজেন পৰীক্ষাত দুগৰাকী ব্যক্তিৰ দেহত ধৰা পৰে ক’ৰণা ভাইৰাছৰ অৱস্থিতি । ইয়াৰ লগতে জিলাখনত ক’ৰণাৰ দ্বিতীয়টো সংক্ৰমণত আক্ৰান্ত হোৱা লোকৰ সংখ্যা 6 গৰাকীলৈ বৃদ্ধি হয় ৷
ডাঃ দিপালী বৰ্মনে ৰাইজ সজাগ নহ’লে ডিমা হাছাও জিলাত পৰিস্থিতি ভয়ংকৰ হোৱাৰ সম্ভাৱনা ব্যক্ত কৰে ৷ তেওঁ জনসাধাৰণক ক’ভিড প্ৰট'কল মানি ৰাজহুৱা স্থানত মাস্ক পৰিধান কৰিবলৈ আৰু সামাজিক দূৰত্ব বর্তাই ৰাখিবলৈ আহ্বান জনায় ৷ আনহাতে জিলাখনত বৰ্তমান প্ৰতিষেধকৰ নাটনি হোৱাৰ কথাও উল্লেখ কৰি তেওঁ কিছুদিনৰ ভিতৰতে পুনৰ যথেষ্ঠ সংখ্যক প্ৰতিষেধক যোগান ধৰা হ’ব বুলি জানিবলৈ দিয়ে ৷
লগতে পঢ়ক : দিছপুৰলৈকে শিপা মেলিছে ব্ৰইলাৰ চিণ্ডিকেটে : আৰক্ষীৰ হাতত বিস্ফোৰক তথ্য
