ডিব্ৰুগড়, 2 জুন : এটা ভয়ংকৰ খবৰে জোঁকাৰি গৈছে ডিব্ৰুগড় জিলা ৷ ডিব্ৰুগড়স্থিত অসম চিকিৎসা মহাবিদ্যালয় হাস্পতালৰ মেডিচিন ৱাৰ্ডত চিকিৎসাধীন হৈ থকা দুজনকৈ ব্যক্তিৰ দেহত পোৱা গৈছে ক'ভিড-১৯ ৷ এই খবৰ প্ৰকাশৰ পাচতেই সমগ্ৰ চহৰখনত চাঞ্চল্যৰ সৃষ্টি হৈছে ।
জানিব পৰা মতে, অসম চিকিৎসা মহাবিদ্যালয় হাস্পতালৰ মেডিচিন বিভাগৰ চাৰি আৰু পাঁচ নং ব্লকৰ তৃতীয় মহলাত চিকিৎসাধীন হৈ আছিল ৰোগী দুজন ৷ চিকিৎসাধীন অৱস্থাত তেওঁলোক ক'ভিড-১৯ আক্ৰান্ত হোৱা খবৰে ব্যাপক হৈ-চৈৰ সৃষ্টি কৰে।
উল্লেখ্য যে, তেওঁলোকৰ এজন মুম্বাইৰ পৰা আহি প্ৰাতিষ্ঠানিক কোৱাৰেন্টাইনত থকা অৱস্থাত আক্ৰান্ত হৈছিল ডায়েৰীত ৷ ততাতৈয়াকৈ লোকজনক আইচ'লেশ্যন ৱাৰ্ডত ভৰ্তি কৰি স্বাৱ পৰীক্ষা কৰা হয় ৷ প্ৰথম দুটা স্বাৱ পৰীক্ষাত ব্যক্তিগৰাকীৰ দেহত ক'ভিত-19 ধৰা পৰা নাছিল ৷ যাৰবাবে তেওঁক আইচ'লেশ্যনৰ পৰা আনি মেডিচিন বিভাগৰ ৱাৰ্ডত ভৰ্তি কৰোৱা হয় ৷ কিন্তু তৃতীয়টো পৰীক্ষাত লোকজনৰ দেহত ভাইৰাছবিধৰ অৱস্থিতিৰ কথা পোহৰলৈ আহে ৷
আনহাতে, আনজন ব্যক্তি চেন্নাইৰ পৰা আহি একেটা কোৱাৰেন্টাইন কেন্দ্ৰত ভৰ্তি হৈছিল যদিও লোকজন সামান্য জ্বৰ আৰু পেটৰ বিষত আক্ৰান্ত হোৱা তেওঁকো ভৰ্তি কৰোৱা হয় আইচ'লেশ্যনত ৷ কিন্তু দুবাৰ স্বাৱ পৰীক্ষাত ক'ভিড-19 ধৰা নপৰাত তেওঁকো মেডিচিন কক্ষত ভৰ্তি কৰা হৈছিল ৷ কিন্তু তৃতীয়টো পৰীক্ষাতহে লোকজন ক'ভিড-19 আক্ৰান্ত বুলি জানিব পৰা গৈছে ৷
আনহাতে, মৰাণ নবোদয় স্কুলৰ কোৱাৰেইন্টাইনতে থকা আন এজন ব্যক্তি আৰু লেজাই মডেল হাস্পতালৰ আইচ'লেশ্যন ৱাৰ্ডত থকা এজন ব্যক্তিৰ দেহতো পোৱা গৈছে ক'ভিড 19 । ইয়াকে লৈ ডিব্ৰুগড়ত মুঠ ৪০জন ক'ভিড-19 আক্ৰান্ত চিনাক্ত হৈছে ।
আশ্চৰ্যজনক কথা যে, ইপিনে অসম চিকিৎসা মহাবিদ্যালয়ৰ মেডিচিন বিভাগতে বিভিন্ন ৰোগত চিকিৎসাধীন হৈ আছে বহুতো ৰোগী। কেইবাজনো জেষ্ঠ আৰু কণিষ্ঠ চিকিৎসকসহ নাৰ্চ,কৰ্মচাৰী আদিও ক'ভিড-19 আক্ৰান্ত দুজনৰ সংস্পৰ্শলৈ আহিছে । তেনে ক্ষেত্ৰত চিকিৎসা মহাবিদ্যালয় কৰ্তৃপক্ষই সমগ্ৰ মেডিচিন ৱাৰ্ডটো কন্টেইনমেণ্ট জ'ন হিচাপে চিহ্নিত কৰিছে ।
লগতে পঢ়ক : কাকপথাৰত মুক্ত স্থানত পেলাই থোৱা অৱস্থাত উদ্ধাৰ পিপিই কীট
