ডিব্ৰুগড়, 20 জুলাই : ডিব্ৰুগড় জিলাৰ বগীবিল নাহৰণি গাঁৱত মঙলবাৰে সংঘটিত হৈছে এক কিশোৰ নিৰ্যাতন (Abuse)ৰ ঘটনা ৷ ডিব্ৰুগড়ৰ এটা আভিজাত্য পৰিয়ালৰ বিৰুদ্ধে উত্থাপন হৈছে এই নিৰ্যাতন কাণ্ডৰ অভিযোগ ৷ অভিযোগ অনুসৰি, গাঁৱখনৰ এটি 12 বছৰীয়া কিশোৰক নিজ বাসগৃহত বনকৰা হিচাপে ৰাখি অমানুষিক নিৰ্যাতন চলাই আহিছে এগৰাকী শিক্ষয়িত্ৰীয়ে ৷ সমগ্ৰ ঘটনা নিজ মুখেৰে বৰ্ণনা কৰে কিশোৰটিয়ে ৷
ভুক্তভোগী কিশোৰটিৰ পৰিয়ালে সদৰী কৰা মতে, বিগত তিনি মাহৰ পূৰ্বে কিশোৰটিক তোলনীয়া পুত্ৰ হিচাপে লৈ গৈছিল বগীবিল মধ্য ইংৰাজী বিদ্যালয়ৰ এগৰাকী শিক্ষয়িত্ৰীয়ে ৷ শিক্ষয়িত্ৰীগৰাকীৰ স্বামীৰ চাকৰি সূত্ৰে ডিব্ৰুগড় বিশ্ববিদ্যালয়ৰ আৱাসগৃহত থকা শিক্ষয়িত্ৰীগৰাকীয়ে কিশোৰটিক চলাইছিল অকথ্য নিৰ্যাতন । কিশোৰটিক চোকা অস্ত্ৰ, লোহা, বাঁহৰ লাঠীৰে আক্ৰমণ কৰাৰ ভয়ংকৰ অভিযোগ উত্থাপন কৰিছে কিশোৰটিৰ পৰিয়ালে ৷
তোলনীয়া পুত্ৰ হিচাপে লৈ গৈ কিশোৰটিক বনকৰা ল’ৰাৰ দৰে কাম কৰিবলৈ আদেশ দিছিল শিক্ষয়িত্ৰীগৰাকীয়ে । কেৱল সেয়াই নহয়, কিশোৰটিক হত্যা কৰি শৌচাগাৰৰ টেংকত ভৰাই থোৱাৰো ভাবুকি প্ৰদান কৰা হৈছিল ৷ ইফালে দুদিন ধৰি কিশোৰটিক বাথৰুমত সোমাই ৰখাৰ কথাও পোহৰলৈ আহিছে ।
ইমানদিনে অমানুষিক নিৰ্যাতন চলোৱাৰ পাচত তিনিদিন পূৰ্বে কিশোৰটিৰ বগীবিলৰ ঘৰত আহিছিল অভিযুক্ত শিক্ষয়িত্ৰীগৰাকীয়ে । ঘটনাৰ সন্দৰ্ভত আৰক্ষী থানাত এখন এজাহাৰ দাখিল কৰিছে কিশোৰটিৰ পৰিয়ালৰ লোকে । এই এজাহাৰৰ ভিত্তিতেই আৰক্ষীয়ে ইতিমধ্যে গোচৰ ৰুজু কৰা বুলি জানিব পৰা গৈছে ৷
দেশৰ লগতে ৰাজ্যত নিৰ্যাতনে ভয়ংকৰ ৰূপ লোৱা পৰিলক্ষিত হৈছে ৷ শিশু নিৰ্যাতনৰ পৰা আৰম্ভ কৰি বোৱাৰী নিৰ্যাতন, যৌন নিৰ্যাতন এতিয়া প্ৰচলিত ঘটনাৰ লেখীয়া হৈ পৰিছে ৷ চৰকাৰে এই নিৰ্যাতনৰ বিৰুদ্ধে পৃথকে পৃথকে আইন বলৱৎ কৰিছে যদিও আইনক যেন কেৰেপেই নকৰে নিৰ্যাতনকাৰীসকলে ৷ ইয়াৰ বিপৰীতে প্ৰতিদিনে বৃদ্ধি পাবলৈ ধৰিছে এই নিৰ্যাতনৰ ঘটনা ৷
লগতে পঢ়ক : ভাৰত ভূটান সীমান্তত সংঘটিত হ’ল মানৱ সৰবৰাহৰ ঘটনা
