মৰাণ, 15 জুলাই : মহামাৰী কৰ'ণা ভাইৰাছৰ বাবে সমগ্ৰ দেশত লক ডাউন বলবৎ হোৱাৰ সময়তে বিভিন্নজনে লক ডাউনৰ সময়খিনি সৎ ব্যৱহাৰ কৰিবৰ বাবে বিভিন্ন কাম কৰা পৰিলক্ষিত হৈছে ৷ কোনোবাজনে যদি ছবি আঁকিছে কোনোবাজনে আকৌ নৃত্য-গীতৰ মাজৰে সময় অতিবাহিত কৰিছে ৷ আন কোনোবাই আকৌ ৰন্ধন প্ৰণালীৰ জৰিয়তে সময় অতিবাহিত কৰা দেখা পোৱা গৈছে ৷
কিন্তু লক ডাউনৰ সময়ত আসাম বুক অৱ ৰেকৰ্ডছত নিজৰ নাম অন্তৰ্ভুক্ত কৰিবলৈ সক্ষম হৈছে মৰাণৰ এজন যুৱকে ৷ ২০ জুনত কলাগুৰু বিষ্ণু প্ৰসাদ ৰাভাৰ মৃত্যু তিথিত ৭ ফুট দীঘল আৰু ৫ ফুট ৯ ইঞ্চি বহল জোখৰ এখন প্ৰতিচ্ছবি নিজস্ব পদ্ধতিৰে অংকণ কৰি আসাম বুক অৱ ৰেকৰ্ডছত নাম অন্তৰ্ভুক্ত কৰিবলৈ সক্ষম হৈছে যুৱকজনে ৷ মৰাণ কণিষ্ঠ মহাবিদ্যালয়ৰ দ্বাদশ শ্ৰেণীৰ ১৮ বছৰীয়া এই যুৱকজনে জুইৰ শিখাৰ ধোঁৱাৰ এক বিশেষ পদ্ধতিৰে প্ৰতিচ্ছবি অংকণ কৰি শিল্পীৰ পৰিচয় দাঙি ধৰিবলৈ সক্ষম হৈছে ৷ লগতে,যুৱকজনে মুখা শিল্প,শিলৰ ওপৰত বিভিন্ন চিত্ৰ অংকন কৰি সময় অতিবাহিত কৰা পৰিলক্ষিত হৈছে ৷
উল্লেখযোগ্য যে,পিতৃ দুলাল গগৈ আৰু মাতৃ দীপা গগৈৰ পুত্ৰ সীমান্ত গগৈয়ে প্ৰাথমিক বিদ্যালয়ৰ অৱস্থাৰ পৰাই বিভিন্ন ধৰণৰ চিত্ৰ অংকণ কৰি নিজৰ পৰিচয় দাঙি ধৰিবলৈ সক্ষম হৈছিল ৷ বৰ্তমান মৰাণ ফটিকাছোৱা অভয়পুৰীয়া গাঁওস্থিত 'Rainbow Art' ৰ চিত্ৰকলাৰ ডিপ্লমা পাঠ্যক্ৰমৰ চতুৰ্থ বৰ্ষৰ ছাত্ৰ সীমান্ত গগৈ বিশ্ব ৰেকৰ্ডছৰ বাবে প্ৰস্তুতিত ব্যস্ত ৷ বিশ্বৰ এই জটিল ক্ষণত সৃষ্টিশীল সাধনাৰে সফলতাৰ জখলাত আৰোহণ কৰিবলৈ সক্ষম হোৱা সীমান্ত গগৈৰ কৃতিত্বত পৰিয়ালৰ লগতে মৰাণবাসীয়ে গৌৰৱ প্ৰকাশ কৰিছে ৷
লগতে পঢ়ক : পথৰ দুৰৱস্থাই দুৰ্ভোগ ভোগাইছে সুন্দৰীদিয়া সত্ৰবাসীক
