লালুকাত নিয়ন্ত্ৰণ হেৰুৱাই ট্ৰাক সোমাল বাসগৃহত

ডিব্ৰুগড়ত বৃহস্পতিবাৰে নিশাৰ ভাগত সংঘটিত হয় এক ভয়ংকৰ দুৰ্ঘটনা ৷ তীব্ৰবেগী লোহাভৰ্তি ট্ৰাকে নিয়ন্ত্ৰণ হেৰুৱাই প্ৰৱেশ কৰে মানুহৰ বাসগৃহত ৷ ঘটনাৰ ফলত এজন লোক গুৰুতৰভাৱে আহত ৷

ডিব্ৰুগড়, 31 অক্টোবৰঃ ডিব্ৰুগড়ত বৃহস্পতিবাৰে নিশা এখন লোহাভৰ্তি ট্ৰাকে নিয়ন্ত্ৰণ হেৰুৱাই প্ৰৱেশ কৰে মানুহৰ বাসগৃহত ৷ তীব্ৰবেগী ট্ৰাকখনে লালুকাত এখন বাইক মহতিয়াই নি প্ৰৱেশ কৰে এঘৰত ৷ AS-06BC-2836 নম্বৰৰ লোহা ভৰ্তি ট্ৰাক খনে AS-07J-3196 নম্বৰৰ মটৰ চাইকেলখন মহতিয়াই নিয়াৰ ফলতে সংঘটিত হয় দুৰ্ঘটনাটো ৷

লগতে পঢ়কঃ স্থলসেনাৰ উদ্যোগত ঢালিগাঁৱত কৌশলী বিকাশ অনুষ্ঠান

প্ৰত্যক্ষদৰ্শীৰ ভাষ্য অনুসৰি,ডিব্ৰুগড়ৰ দিশৰ পৰা গৈ থকা ট্ৰাকখনে ভুল দিশেৰে আহি মৰাণৰ দিশৰ পৰা আহি থকা মটৰচাইকেল আৰোহীজনক মহতিয়াই নিয়ে ৷ ফলত নিয়ন্ত্ৰণ হেৰুৱাই ট্ৰাকখনে প্ৰৱেশ কৰে পথৰ কাষৰ দোকানৰ লগতে চঞ্জু আহমেদ নামৰ লোকজনৰ বাসগৃহত ৷ দুৰ্ঘটনাটোত মটৰচাইকেল আৰোহীজন গুৰুতৰভাৱে আঘাতপ্ৰাপ্ত হোৱাৰ লগতে চঞ্জু আহমেদৰ ভাতৃ অভি আহমেদকো আঘাতপ্ৰাপ্ত কৰে ৷ আঘাতপ্ৰাপ্ত দুয়োজনকে উন্নত চিকিৎসাৰ বাবে প্ৰেৰণ কৰা হয় ৷

আনহাতে ঘটনা সংঘটিত কৰিয়ে পলায়ন কৰে ট্ৰাকখনৰ চালকজনে ৷ ঘটনাৰ পিচতে দীৰ্ঘসময় ধৰি ৰাষ্ট্ৰীয় ঘাইপথটোত বহু যানবাহন আবদ্ধ হৈ পৰাৰ ফলতে সৃষ্টি হয় উত্তপ্ত পৰিস্থিতিৰ ৷ দুৰ্ঘটনাটোত আঘাতপ্ৰাপ্ত মটৰচাইকেল আৰোহীজনক বৰ্তমান সময়লৈকে চিনাক্ত কৰিব পৰা হোৱা নাই ৷

লগতে চাওকঃ দুই লাখ টকীয়া দুটা বিদ্যুৎ মাচুলৰ বিল ! হতবাক গৃহস্ত