টিংখাং, 19 মে': লক ডাউনৰ মাজতে সোমবাৰে ডিব্ৰুগড়ৰ জিলাৰ টিংখাঙৰ ঔফুলীয়া চাহ বাগিচাত সৃষ্টি হয় উত্তপ্ত পৰিস্থিতি ৷ ভাৰত চৰকাৰৰ নিদেৰ্শনা অনুসৰি বাগিচা কৰ্তৃপক্ষৰ তৰফৰ পৰা পাবলগীয়া 1 হাজাৰ টকা নোপোৱাৰ বাবে বাগিচা কৰ্তৃপক্ষৰ বিৰুদ্ধে প্ৰতিবাদ সাব্যস্ত কৰে শ্ৰমিক সকলে ৷ ইয়াৰ ওপৰিও শ্ৰমিকৰ ভৱিষ্যত নিধিৰ নামত 2016 চনৰ পৰাই বাগিচাৰ কৰ্তৃপক্ষই ধন কৰ্তন কৰি ৰাখিছে যদিও ভৱিষ্যনিধি একাউন্টত আজি পৰ্যন্ত এটকাও ধন জমা নোহোৱাৰ অভিযোগ শ্ৰমিক সকলৰ ৷
উল্লেখ্য যে, লক ডাউনৰ বাবে সকলো ধৰণৰ কাম কাজৰ লগতে বাগিচাৰ কাম কাজ বন্ধ হৈ থকাৰ বাবে বাগিচাৰ শ্ৰমিকসকলক বাগিচা কৰ্তৃপক্ষৰ তৰফৰ মজুৰি দিয়াৰ আহ্বান জনাইছিল ভাৰত চৰকাৰে ৷ ইয়াৰ পাছতে অসমৰ প্ৰায় সমুহ বাগিচাই ভাৰত চৰকাৰৰ নিদেৰ্শনা মতে শ্ৰমিকক 1 হাজাৰ টকাকৈ মজুৰি প্ৰদান কৰিছে যদিও টিংখাঙৰ ঔফুলীয়া চাহ বাগিচাৰ শ্ৰমিকসকলক কোনো ধৰণৰ মজুৰি কিম্বা সুবিধা প্ৰদান কৰা নাই বাগিচা কৰ্তৃপক্ষই ৷ ইয়াৰ বাবে ক্ষুব্ধ হৈ পৰা শ্ৰমিক সকলে সোমবাৰে বাগিচা কৰ্তৃপক্ষৰ বিৰুদ্ধে উত্তাল প্ৰতিবাদ সাব্যস্ত কৰাৰ লগতে বাগিচাৰ কাৰ্যালয় ঘেৰাও কৰে ৷ ইয়াৰ লগতে শ্ৰমিকৰ ভৱিষ্যত নিধিৰ নামত 2016 চনৰ পৰাই বাগিচাৰ কৰ্তৃপক্ষই ধন কৰ্তন কৰি ৰাখিছে যদিও ভৱিষ্যনিধি একাউন্টত আজি পৰ্যন্ত এটকাও ধন জমা নোহোৱাৰ অভিযোগ উত্থাপন কৰে শ্ৰমিক সকলে৷
