ডিব্ৰুগড়, 15 জুন : ডিব্ৰুগড় আৰক্ষীৰ জালত পৰিল এজন ভুৱা চিকিৎসক ৷ জানিব পৰা মতে, ইয়াকুব আলি নামৰ ভুৱা চিকিৎসকজনে ডিব্ৰুগড় জিলাৰ হাটিআলি চাহ বাগিচাত ৰোগীক চিকিৎসা কৰি আহিছিল ৷ ডাঃ ইয়াকুব আলি নামৰ একে নামৰ এজন চিকিৎসকৰ নামত প্ৰায় 12 বছৰ ধৰি ইয়াকুব আলিয়ে নিজকে এজন চিকিৎসক হিচাপে পৰিচয় দি আহিছিল ৷
আৰক্ষীয়ে সদৰী কৰা মতে, ইয়াকুব আলিৰ ঘৰ দেৰগাঁৱৰ বাটিকুৰিয়াত ৷ চিৰাং জিলাৰ কাজলগাঁও চিভিল হাস্পতালত কৰ্মৰত চিকিৎসক ডাঃ ইয়াকুব আলিৰ পৰিচয় পত্ৰ আৰু প্ৰমান পত্ৰ নকল কৰি হাটিআলি চাহ বাগিচাত কৰ্মৰত হৈ আছিল দেৰগাঁৱৰ ইয়াকুব আলি ।
জানিব পৰা মতে, মঙলবাৰে গোপন সূত্ৰৰ পম খেদি চলোৱা এক অনুসন্ধানত চাবুৱাৰ হাটিআলি চাহ বাগিচাত কৰ্মৰত চিকিৎসক ইয়াকুব আলি এজন ভুৱা চিকিৎসক বুলি ডিব্ৰুগড় আৰক্ষী নিশ্চিত হয় ৷ ইয়াৰ পাচতে ডিব্ৰুগড় আৰক্ষীয়ে ইয়াকুব আলীক গ্ৰেপ্তাৰ কৰে ৷
ইয়াৰ পূৰ্বে ইয়াকুব আলিয়ে চিকিৎসা বিষয়া হিচাপে গ্ৰীণউড চাহ বাগিচা (ডিব্ৰুগড়), বৰহোলা চাহ বাগিচা(যোৰহাট)ৰ দৰে প্ৰতিষ্ঠিত চাহ বাগিচাত ৰোগীক চিকিৎসা কৰিছিল ৷ বৰ্তমান আৰক্ষীয়ে চাবুৱা থানাত 101/21 নম্বৰত এক গোচৰ ৰুজু কৰি ভাৰতীয় দণ্ডবিধি আইনৰ ইউ/এছ 419/420/468ৰ অধীনত ইয়াকুব আলিক ন্যায়িক জিম্মালৈ প্ৰেৰণ কৰিছে ৷
লগতে পঢ়ক: এবছৰে ন্যায়ৰ পৰা বঞ্চিত বৰহোলাৰ জয়ন্ত বৰাৰ পৰিয়াল
