ডিব্ৰুগড়,17 জুন: লকডাউনৰ সময়চোৱাত শিশু তথা কিশোৰ-কিশোৰীৰ মানসিক উৎকৰ্ষ সাধনৰ বাবে তিনি দশক পুৰণি ডিব্ৰুগড়ৰ আখৰা ঘৰে লৈছে বিশেষ পদক্ষেপ ৷ সৰ্বভাৰতীয় পৰ্যায়ত চিনাকি অসমৰ আগশাৰীৰ নাট্য গোষ্ঠী তথা নাট প্ৰশিক্ষণৰ অন্যতম কেন্দ্ৰ ৰূপে পৰিচিত ডিব্ৰুগড়ৰ আখৰা ঘৰে নাট্যকাৰ অসীম শৰ্মাৰ তত্বাৱধানত আয়োজন কৰিছে এক বিশেষ অনলাইন কৰ্মশালা ৷
যাৰ জৰিয়তে শিশুৰ গ্ৰীষ্মকালীন কৰ্মশালা, নাটক,আবৃত্তি, কিছু আনন্দ, যোগাসন, কল্পনাশক্তি, বৈজ্ঞানিক চিন্তা নাটকৰ যোগেদি শিক্ষা ইত্যাদি বিষয়ত 15 দিনৰ বাবে আয়োজন কৰা হৈছে এই কৰ্মশালাখন ৷ বিশিষ্ট নাট্যকাৰ, পৰিচালক, অভিনেতা তথা আখৰা ঘৰৰ তত্বাৱধায়ক অসীম কুমাৰ শৰ্মাৰ তত্বাৱধানত এই কৰ্মশালা নিতৌ এঘণ্টাৰ বাবে প্ৰচাৰ কৰা হ'ব ৷
উল্লেখ্য যে, মুঠ তিনিটা পৰ্যায়ত কলা সংস্কৃতিৰ চৰ্চাৰে উৎকৰ্ষ সাধনৰ এই কৰ্মশালাখন সম্পাদন হ'ব ৷ সেই অনুসৰি দিনৰ ১২ বজাৰ পৰা ১ বজালৈ, ২ বজাৰ পৰা ৩ বজালৈ, ৪ বজাৰ পৰা ৫ বজালৈ সময় সীমা নিৰ্ধাৰণ কৰিছে আখৰা ঘৰে ৷ শীঘ্ৰে আৰম্ভণিৰ দিন ঘোষণা কৰিবলগীয়া এই কৰ্মশালাত যোগদানৰ বাবে 99544-49554 নম্বৰত যোগযোগ কৰিব পাৰে বুলিও জানিবলৈ দিছে নাট্য গোষ্ঠীটোৰ তত্বাৱধায়ক গৰাকীয়ে ৷ সম্প্ৰতি এটা ছেছনত 20 গৰাকী শিশু তথা কিশোৰ-কিশোৰে অংশ গ্ৰহণ কৰিব পাৰিব ৷
