ডিব্ৰুগড়, 17 মে’ : আজি ঘোষণা কৰা হ’ল ডাঃ সৰিতা তছনিৱাল হত্যাকাণ্ড গোচৰৰ চূড়ান্ত ৰায় ৷ সুদীৰ্ঘ 9 বছৰৰ অন্তত ডাঃ সৰিতা তছনিৱাল হত্যাকাণ্ড গোচৰৰ ৰায়দান প্ৰদান কৰে ডিব্ৰুগড় সত্ৰ ন্যায়াধীশ আদালতে । চাঞ্চল্যকৰ সৰিতা তছনিৱাল হত্যাকাণ্ড সন্দৰ্ভত অভিযুক্ত কিৰো মেচক দোষী সাব্যস্ত কৰে ডিব্ৰুগড়ৰ সত্ৰ ন্যায়াধীশৰ আদালতে (Dr Sarita Toshniwal murder case) ।
আনহাতে অভিযুক্ত চিকিৎসক দীপমনি শইকীয়াক দোষমুক্ত ঘোষণা কৰা হয় । 2014 চনৰ 9 মে'ত সংঘটিত হোৱা হত্যাকাণ্ডৰ আজি চূড়ান্ত ৰায়দানৰ দিন ঘোষণা কৰিছিল সত্ৰ ন্যায়াধীশ আদালতে । ইয়াৰ পূৰ্বে দেশ কঁপোৱা ডাঃ সৰিতা তছনিৱাল হত্যাকাণ্ড গোচৰৰ চূড়ান্ত ৰায়দানৰ দিন নিৰ্ধাৰণ কৰা হৈছিল 12 মে’ৰ দিনা ৷ মূল অভিযুক্ত কিৰো মেচ অসুস্থ বুলি তেওঁৰ অধিবক্তাই জনোৱাৰ পিচত এই ৰায়দান স্থগিত ৰখা হয় আৰু পৰৱৰ্তী শুনানিৰ দিন ঘোষণা কৰে 17 মে’ (Sarita Toshniwal murder case verdict postponed) ।
দোষী সাব্যস্ত হ’লেও ৱাৰ্ড বয় কিৰো মেচৰ শাস্তি যাৱজ্জীৱন কাৰাদণ্ড হ'বনে ফাঁচী হ'ব সেয়া 18 মে’ৰ দিনাহে আদালতে ঘোষণা কৰিব বুলি জানিবলৈ দিয়ে । ইফালে এই ৰায়দানক লৈ সন্তুষ্ট নহয় ডাঃ সৰিতা তছনিৱাল পৰিয়াল ৷ যাৰ বাবে এতিয়া দ্বাৰস্থ হ’ব উচ্চ ন্যায়ালয়ৰ ৷
উল্লেখযোগ্য যে কনিষ্ঠ চিকিৎসক ডাঃ সৰিতা তছনিৱালৰ মৃতদেহ 2014 চনৰ 10 মে'ত স্ত্ৰী ৰোগ আৰু প্ৰসূতি চিকিৎসা বিভাগৰ আই চি ইউত ৰহস্যজনকভাৱে উদ্ধাৰ হৈছিল । 2014 চনৰ 9 মে'ৰ নিশা অসম চিকিৎসা মহাবিদ্যালয়ৰ প্ৰসূতি ৰোগ বিভাগৰ ICUত কৰ্তব্যৰত অৱস্থাত ডাঃ সৰিতা তছনিৱালক হত্যা কৰাৰ অভিযোগ উত্থাপিত হৈছিল ৷ ইয়াৰ পিচতে চিকিৎসক ডাঃ দীপমণি শইকীয়া আৰু ৱাৰ্ড বয় কিৰো মেচক আটক কৰি তদন্ত চলাইছিল ডিব্ৰুগড়ৰ আৰক্ষীয়ে ।
কিন্তু সুদীৰ্ঘ 9 বছৰৰ অন্তত এই ঘটনাৰ সৈতে নাম সাঙোৰ খোৱা চিকিৎসক ডাঃ দীপমণি শইকীয়াক বুধবাৰে দোষমুক্ত বুলি ঘোষণা কৰিছে ডিব্ৰুগড়ৰ সত্ৰ ন্যায়াধীশৰ আদালতে (Dibrugarh District and Session Judge Court) ।
লগতে পঢ়ক : Sarita Toshniwal Murder Case : ১৭ মে’ত হ’ব ডাঃ সৰিতা তছনিৱাল হত্যাৰ গোচৰৰ চূড়ান্ত ৰায়দান
