মৰাণ,18 অক্টোবৰ : মৰাণৰ সমীপৰ ডিমৌ ৰাজহ চক্ৰৰ অন্তৰ্গত পানীদিহিং মৌজাৰ পশ্চিম পানীদিহিঙত গৰু চোৰৰ ত্ৰাসে চিন্তিত কৰি তুলিছে অঞ্চলটোৰ কৃষক ৰাইজক । জানিব পৰা মতে,15 অক্টোবৰত এজান্তি গাঁৱৰ প্ৰকাশ শৰ্মা,কৃষ্ণ শৰ্মা আৰু আনন্দ টাই নামৰ তিনিজন কৃষকৰ ব্ৰহ্মপুত্ৰ দক্ষিণ টিকিৰা চাপৰিত থকা খুঁটিৰ পৰা চোৰে তিনিজনীকৈ গাই গৰু চুৰি কৰি নিয়ে ।
দেওবাৰে দিচাংমুখ বলমা ঘাটত AS-04-BC-3801 নম্বৰৰ বাহনত তুলি থাকোতে স্থানীয় গাঁওৰক্ষী বাহিনীয়ে দিচাংমুখ বলমা যুৱক সংঘ আৰু চিতলীয়া যুৱক সংঘৰ সহযোগত গাই গৰু তিনিজনী উদ্ধাৰ কৰিবলৈ সক্ষম হয় । অৱশ্যে ঘটনাস্থলীৰ পৰা পলাই যায় চোৰৰ দলটো ৷
আনহাতে গাওঁৰক্ষী বাহিনীয়ে জনোৱা মতে,শামুকজান গাঁৱৰ মেকাৰী মিলি (32),বিপুল মিলি (30) আৰু বালিকুৰ গাঁৱৰ বিশাল মিলি(35) নামৰ তিনিজন যুৱক গৰু চুৰি ঘটনাৰ লগত জড়িত হৈ আছে । ইফালে পৰিয়াল তিনিটাই চুৰি সন্দৰ্ভত নিতাইপুখুৰী আৰক্ষী চকীত এজাহাৰ দাখিল কৰিছে ।
লগতে পঢ়ক : সমুজ্জল ভট্টাচাৰ্যৰ বাবে অগপৰ দুৱাৰ খোলা আছে: সত্যব্ৰত কলিতা
