নাহৰকটীয়া , 22 এপ্ৰিল : এগৰাকী ক'ভিড আক্ৰান্ত গৰ্ভৱতী মহিলাক ঘৰলৈ আনি আদবাটতে নাহৰকটীয়া নগৰত এৰি থৈ গ’ল অইল ইণ্ডিয়া লিমিটেডৰ এম্বুলেন্সে ৷ অইলৰ চিকিৎসালয়ৰ এম্বুলেন্সত এনেকৈ ক'ভিড আক্ৰান্তক আনি জনসমাগমৰ মাজত এৰি যোৱা কাৰ্যকলৈ আৰম্ভ হৈছে তীব্ৰ সমালোচনাৰ ৷
উল্লেখ্য যে বৃহস্পতিবাৰে নাহৰকটীয়াৰ পুৰণি গাঁৱৰ এগৰাকী গৰ্ভৱতী মহিলাই ৰুটিন স্বাস্থ্য পৰীক্ষা কৰাবলৈ উপস্থিত হৈছিল দুলীয়াজানৰ অইলৰ চিকিৎসালয়ত । উক্ত চিকিৎসালয় খনত মহিলা গৰাকীক ৰেপিড এণ্টিজেন টেষ্ট কৰাৰ পিছতেই তেখেতৰ গাত ক'ভিড ১৯ৰ অৱস্থিতি ধৰা পৰে । পৰৱৰ্তী সময়ত চিকিৎসালয়খনৰ পৰা মহিলা গৰাকীক হোম কোৱাৰেণ্টাইনৰ বাবে নিজা ঘৰলৈ এম্বুলেন্সত পঠিয়াই দিয়া হয় ৷ কিন্তু মহিলাগৰাকীৰ ঘৰ পাবলৈ মাত্ৰ কেই কিলোমিটাৰ মান থাকোতেই নাহৰকটীয়াৰ দৈনিক বজাৰ এলেকাত এম্বুলেঞ্চৰ সৈতে অহা স্বাস্থ্য কৰ্মীয়ে ৰোগাক্ৰান্ত মহিলাগৰাকীক এৰি যায় ৷ স্থানীয় লোকক গৰ্ভৱতী মহিলা গৰাকী ক'ভিড পজিটিভ বুলি কৈ এনেকৈ দায়িত্বজ্ঞানহীন ভাৱে এৰি যোৱা কাৰ্যক সকলোৱে দিছে গৰিহনা ৷ ইয়াৰ পিছতে সমগ্ৰ নাহৰকটীয়া নগৰত এতিয়া আতংকময় পৰিৱেশৰ সৃষ্টি হোৱা পৰিলক্ষিত হয় ৷
লগতে পঢ়ক : হুঁচৰি গোৱা ধনেৰে শিক্ষকে ৰং কৰিলে বিদ্যালয়ৰ চাৰিবেৰত
