মৰাণ, ২৬ জুন : এফালে ২০২২ চনৰ পৰা কেন্দ্ৰীয় চৰকাৰে ইউৰিয়া আমদানি নকৰাৰ সিদ্ধান্ত লৈছে, আনফালে ইউৰিয়া উৎপাদন কৰা সাৰ কাৰখানাৰ ওপৰত গুৰুত্ব আৰোপ কৰা নাই । ১৯৬৬ চনত অসমৰ নামৰূপত স্থাপন কৰা সাৰ কাৰখানাটোৰ এতিয়া মৃতপ্ৰায় অৱস্থা । উত্তৰ-পূৱৰ একমাত্র গেছভিত্তিক সাৰ কাৰখানাটোৰ উন্নয়নৰ বাবে কোনো এখন চৰকাৰে বিশেষ ভূমিকা গ্ৰহণ কৰা পৰিলক্ষিত নহ'ল । বিগত ১৪ বছৰে সাৰ কাৰখানাটোৰ চতুর্থ গোট স্থাপন হোৱাৰ কথা চৰকাৰে কৈ আহিছে যদিও সেয়া আজিও কাৰ্যকৰী হৈ উঠা নাই ।
শুকুৰবাৰে সদৌ অসম ছাত্ৰ সন্থাৰ কেন্দ্ৰীয় নেতৃত্বই নামৰূপত থকা ব্রহ্মপুত্র ভেলী ফার্টিলাইজাৰ কর্প'ৰেশ্যন লিমিটেডৰ কাৰখানা পৰিদৰ্শন কৰে । লগতে কাৰখানা কৰ্তৃপক্ষৰে আলোচনাতো মিলিত হয় আছুৰ নেতাসকলে । সদৌ অসম ছাত্ৰ সন্থাৰ সাধাৰণ সম্পাদক শংকৰজ্যোতি বৰুৱাৰ নেতৃত্বত যোৱা দলটোৱে কাৰখানাৰ তৃতীয়টো গোট অধিক উৎপাদনক্ষম কৰি অতি শীঘ্ৰে চতুৰ্থটো গোট স্থাপনৰ বিহিত ব্যৱস্থা ল'বলৈ দাবী জনায় ।
লগতে সদৌ অসম ছাত্ৰ সন্থাৰ সম্পাদক শংকৰজ্যোতি বৰুৱাই কয় যে, ‘সমগ্ৰ উত্তৰ-পূৰ্ৱাঞ্চল সাৰৰ ক'লা বজাৰে গ্ৰাস কৰা আৰু উত্তৰ-পূৱৰ একমাত্ৰ ৰাজহুৱা খণ্ডৰ সাৰ কাৰখানাটোত মৃত্যুঘন্টা বজাৰ পৰ্যায় আহি পৰাতো চৰম পৰিতাপৰ বিষয় । কাৰখানাটোৰ তৃতীয়টো গোটৰো বৰ্তমান অৱস্থা শোচনীয় । চতুৰ্থ গোট স্থাপন কৰিম বুলি চৰকাৰে জনতাক আভুঁৱাভাৰি মাথোঁ নিৰ্বাচনী বৈতৰণী পাৰ হৈ আছে । ’
চলিত বৰ্ষত কাৰখানাটোত ১ মাৰ্চৰ পৰা ১১ জুনলৈ ৭২ দিনত নিৰ্ধাৰিত ৭২০০০ মেট্ৰিক টনৰ বিপৰীতে মাত্ৰ ২৬,৬০০ মেট্ৰিক টন ইউৰিয়া উৎপাদন হোৱাটো অতি উদ্বেগজনক বিষয় । উল্লেখ্য যে, ২০০২ চনত কাৰাখানটোৰ দ্বিতীয় আৰু তৃতীয় গোট পৰিচালনাৰ দায়িত্ব হিন্দুস্তান সাৰ নিগমৰ পৰা ব্রহ্মপুত্র ভেলী ফার্টিলাইজাৰ কর্প'ৰেছন লিমিটেডলৈ হস্তান্তৰ কৰা হয় । কিন্তু ইয়াৰ পিছতো কোনো পৰিৱৰ্তন হোৱা নাই । আশানুৰূপভাৱে উৎপাদন বৃদ্ধি পোৱা নাই ।
