মৰাণ, 11 ডিচেম্বৰ : জয়পুৰ বৰ্ষাৰণ্যত এনথ্ৰাস্ক ৰোগত আক্ৰান্ত হৈ তিনিদিনত দুটাকৈ বনৰীয়া হাতীৰ মৃত্যুৰ পাছতে বিশেষজ্ঞ চিকিৎসৰ দলে প্ৰকাশ কৰিছিল ভয়ংকৰ তথ্য৷ পশু চিকিৎসকে সন্দেহ ব্যক্ত কৰা ৰোগৰ লক্ষণকলৈ তীব্ৰ আতংকৰ সৃষ্টি হৈছিল সমগ্ৰ জয়পুৰ অঞ্চলত ৷ তাৰ পাছতে ডিব্ৰুগড় প্ৰশাসন আৰু জিলা পশুচিকিৎসা বিভাগে গ্ৰহণ কৰিছে বিশেষ পদক্ষেপ ৷
কৃষক ৰাইজৰ সুবিধাৰ বাবে বিনামূলীয়াকৈ পশু ৰোগ নিয়াময় কৰিবলৈ বিভিন্ন ধৰণৰ টীকাকৰণৰ ব্যৱস্থা কৰিছে ডিব্ৰুগড় প্ৰশাসন আৰু জিলা পশুচিকিৎসা বিভাগে ৷ বৃহস্পতিবাৰে নাহৰকটীয়া ৰাজ্যিক পশু চিকিৎসালয় আৰু জয়পুৰ আঞ্চলিক বন কাৰ্যালয়ৰ সহযোগত পশুধনক এনথ্ৰাস্ক ৰোগৰ প্ৰতিষেধক প্ৰদানৰ বাবে এক শিবিৰ অনুষ্ঠিত কৰে ৷
উল্লেখ্য যে, ডিব্ৰুগড় জিলাৰ প্ৰায় সংখ্যক ৰাইজে কৃষি আৰু পশুপালন কৰি জীৱন নিৰ্বাহ কৰি আহিছে ৷ তাৰ বাবে এই শিৱিৰৰ জৰিয়তে জয়পুৰ বৰ্ষাৰণ্যৰ দাঁতি কাষৰীয়া টিপাম, নামচাঙ, তাঁতিপথাৰ, লেবাংকোলা আদি এলেকাৰ প্ৰায় ২৭৫ টা গৰুক এনথ্ৰাস্কৰ প্ৰতিষেধক প্ৰদান কৰে ৷ পৰৱৰ্তী পৰ্যায়ত জিলাখনৰ অন্য ঠাই সমূহতো এই প্ৰতিষেধক প্ৰদান কৰা হ'ব বুলি প্ৰশাসনৰ তৰফৰ পৰা জানিবলৈ দিয়ে ৷
লগতে পঢ়ক: কৰিমগঞ্জৰ কেইবাখনো বাগিছাত শ্ৰমিক আৱাসৰ আধাৰশিলা স্থাপন
