মৰাণ, 14 মাৰ্চ: চাবুৱাত বিজেপিৰ ভেঁটিক অগপই শেষ কৰিলে বুলি এক তাৎপৰ্যপূৰ্ণ মন্তব্য কৰিছে সংগীত শিল্পী তথা চাবুৱা সমষ্টিৰ পৰা বিধানসভা নিৰ্বাচনৰ বাবে প্ৰক্ষেপিত কংগ্ৰেছ দলৰ প্ৰাৰ্থী অজয় ফুকনে ৷ এক নিৰ্বাচনী প্ৰচাৰত অংশ লৈ অগপৰ হাতীয়ে চাবুৱাত বিজেপিৰ ঘৰ বাৰী ভাঙি পেলালে বুলি এক মন্তব্য কৰি ফুকনে এইবাৰ চাবুৱা সমষ্টিৰ ৰাইজ কংগ্ৰেছৰ পক্ষত আছে বুলি দাবী কৰে ৷
বিজেপিৰ পদুমো অগপৰ হাতীয়ে গচকি শেষ কৰিলে বুলি মন্তব্য কৰি ফুকনে লগতে কয় যে, চাবুৱাত এতিয়া অগপ আৰু বিজেপিৰ ভেঁটি নাই, বিজেপিৰ যি ভেঁটি আছিল সেয়াও অগপই শেষ কৰি পেলালে । কা আন্দোলনে চাবুৱাত ব্যাপক ৰূপ লৈছিল । সেয়ে চাবুৱাৰ ৰাইজে জানে ভোট কাক দিব লাগে ।
মামাৰ জনপ্ৰিয়তা এতিয়া অসমত লাহে লাহে হ্ৰাস হৈ আহিছে বুলি মন্ত্ৰী হিমন্ত বিশ্ব শৰ্মাক কটাক্ষ কৰি ফুকনে চাবুৱাত কংগ্ৰেছৰ পক্ষত অধিক লোক আছে মন্তব্য কৰে ৷ বিজেপিৰ বহু লোক তেঁওৰ সৈতে যোগাযোগত আছে বুলি মন্তব্য কৰি সমষ্টিটোৰ কংগ্ৰেছ দলৰ প্ৰাৰ্থী গৰাকীয়ে এইবাৰ কংগ্ৰেছৰ বিজয় নিশ্চিত বুলি মন্তব্য কৰে ৷ কংগ্ৰেছৰ নেতৃত্বত মহাজোঁটে চৰকাৰ গঠন কৰিব বুলি মন্তব্য কৰি তেঁও কয় যে, কংগ্ৰেছৰ বিজয় নিশ্চিত বুলি অনুভৱ কৰি এতিয়া বিজেপিয়ে ভয় খাইছে ৷
লগতে পঢ়ক: নিযুক্তিত সংস্কাৰ নহ'ল সোণোৱালৰ দিনত: নিৰ্বাচনত কি সিদ্ধান্ত ল'ব নিবনুৱাই ?
