মৰাণ,২২ নৱেম্বৰ: ভাৰতীয় বিমান প্ৰাধিকৰণৰ উদ্যাগত শনিবাৰে ডিব্ৰুগড় বিমানবন্দৰত মক ড্ৰিল কাৰ্যসূচীৰ আয়োজন কৰা হয় । তৎকালীনভাৱে সংঘটিত দুৰ্যোগৰ সৈতে মোকাবিলা কৰিবলৈ কেইবাটাও বিভাগৰ বিষয়া-কৰ্মচাৰীক এই কাৰ্যসূচীৰ জৰিয়তে প্ৰশিক্ষণ দিয়া হৈছে । যিকোনো সময়ত সৃষ্টি হোৱা জৰুৰীকালীন পৰিস্থিতি কৌশলেৰে নিয়ন্ত্ৰণলৈ আনিব পৰাকৈ সকলোকে সাজু কৰি ৰখাৰ উদ্দেশ্যৰে এই মক ড্ৰিলৰ আয়োজন কৰা হয় ।
ডিব্ৰুগড় বিমানবন্দৰ চৌহদত অনুষ্ঠিত এই মক ড্ৰিলত অংশগ্ৰহণ কৰে জিলাখনৰ দুৰ্যোগ ব্যৱস্থাপনা প্ৰাধিকৰণ, ইণ্ডিগ' এয়াৰলাইনছ, অগ্নি নিৰ্বাপক বাহিনী, চিআইএছএফ, এয়াৰ ফ'ৰ্চ, এছডিআৰএফ, আৰক্ষী, স্বাস্থ্য বিভাগৰ জৰুৰীকালীন সেৱাৰ সৈতে জড়িত বিষয়া-কৰ্মচাৰীসকলে ৷
উল্লেখ্য যে, কেইদিনমান পূৰ্বে ডিব্ৰুগড়ত এক অনুষ্ঠানত অংশ ল'বলৈ আহোতে প্ৰতিকূল বতৰৰ বাবে মুখ্যমন্ত্ৰী সৰ্বানন্দ সোণোৱালে যাত্ৰা কৰা বিমানখনৰ ডিব্ৰুগড় বিমানবন্দৰত বিজুতি ঘটিছিল । মুখ্যমন্ত্ৰীগৰাকী প্ৰায় 35 মিনিট ধৰি আকাশমাৰ্গত বিমানৰ ভিতৰতে আৱদ্ধ হৈ থাকিবলগীয়া হৈছিল । ইয়াৰ পাছতে ভাৰতীয় বিমান প্ৰাধিকৰণে ডিব্ৰুগড় বিমানবন্দৰত আৰম্ভ কৰিছে এই মক ড্ৰিল ৷
ভৱিষ্যতে জৰুৰীকালীন পৰিস্থিতিৰে যুঁজ দিয়াৰ সময়ত এই প্ৰশিক্ষণ সকলোৰে বাবে সহায়ক হ’ব বুলি আশাবাদী ভাৰতীয় বিমান প্ৰাধিকৰণ ।
লগতে পঢ়ক: লামডিঙ-নগাওঁ সংযোগী ৰাষ্ট্ৰীয় ঘাইপথত দুৰ্ঘটনাত নিহত এজন
