ধুবুৰী,12 ফেব্ৰুৱাৰী : ধুবুৰীৰ চৰ ভাষানী গাঁৱৰ বাসিন্দা তথা মহম্মদীয়া এম মাদ্ৰাছাৰ প্ৰধান শিক্ষক হজৰত আলীৰ বাসগৃহত উঠিছে কান্দোনৰ ৰোল ৷ চিকিৎসাৰ অভাৱত মৃত্যুক সাৱটি লোৱা শিক্ষক গৰাকীৰ চৰকাৰী দৰমহাৰ ধনেৰে এসাজ খাবলৈ সৌভাগ্য নহ’ল ।
সুদীৰ্ঘ 34 টা বছৰ বিনা বেতনে শিক্ষকতা কৰি অৱশেষত এক সপ্তাহ পূৰ্বে নিযুক্তি পত্ৰ পাই শিক্ষকৰ মৰ্যাদা লাভ কৰিছিল ধুবুৰীৰ এগৰাকী শিক্ষকে । 52 বছৰ বয়সত নিযুক্তি পত্ৰ লাভ কৰা শিক্ষক হজৰত আলীয়ে বৃহস্পতিবাৰে শহুৰেকৰ ঘৰলৈ ফুৰিবলৈ গৈ হঠাৎ অসুস্থ হৈ পৰে । নিশাৰ ভাগত তেওঁক চিকিৎসালয়লৈ নিয়া হয় যদিও মাজনিশা 2 বজাত শেষ নিশ্বাস ত্যাগ কৰে শিক্ষক গৰাকীয়ে ৷
প্ৰথম দৰমহা পোৱাৰ পূৰ্বেই অৰ্থাৎ নিযুক্তি লাভৰ এক সপ্তাহ পাচতেই পৃথিৱীৰ পৰা চিৰবিদায় ল’লে শিক্ষক গৰাকীয়ে । দীৰ্ঘদিন ধৰি মধুমেহ আৰু উচ্চ ৰক্ত চাপত ভোগাৰ পাচত উপযুক্ত চিকিৎসাৰ অভাৱত মৃত্যু হয় শিক্ষক হজৰত আলীৰ ৷
লগতে পঢ়ক : মৈৰাবাৰীত ড্ৰাগছ সহ এজন গ্ৰেপ্তাৰ
