ধুবুৰী, 2 জানুৱাৰী : নতুন বছৰত নতুন পৰিকল্পনা ল'লে দক্ষিণ শালমাৰা জিলা প্ৰশাসনে। নৱ বৰ্ষৰ শুভেচ্ছা জনালে দক্ষিণ শালমাৰা মানকাচাৰ জিলাৰ উপায়ুক্ত আতিকা চুলতানাই ৷ লগতে জিলাখনৰ সমস্যাৰ সমাধানৰ পথ উলিয়াই মন্তব্য ব্যক্ত কৰে ৷ বিগত বৰ্ষৰ বানপানীত এক ভয়াৱহতাৰ সন্মুখীন হৈছিল দক্ষিণ শালমাৰা মানকাচাৰ জিলা প্ৰশাসন। বানপানীৰ ফলত জিলাখনৰ বিভিন্ন প্ৰান্তত বিস্তৰ ক্ষতিসাধন হৈছিল। তাৰোপৰি বান গৰাখহনীয়াই বিশেষকৈ ভাৰত-বাংলা সীমান্তৰ বৃহৎ অংশ উটুৱাই নিয়াৰ ফলত দেশৰ নিৰাপত্তাৰ প্ৰতি এক ভাবুকিৰ সৃষ্টি কৰিছিল। সেয়ে নতুন বছৰত বিভিন্ন চৰকাৰী আচঁনিৰে গৰাখহনীয়া প্ৰতিৰোধকে ধৰি বিভিন্ন সমস্যা সমাধান কৰাৰ পৰিকল্পনা কৰিছে জিলা উপায়ুক্ত আতিকা চুলতানাই ।
২০১৯ বৰ্ষত আন কোনো সমস্যাৰ সন্মুখীন নহলেও বানপানীয়ে বিস্তৰ ক্ষতিসাধন কৰিছিল বুলি উল্লেখ কৰিলে দক্ষিণ শালমাৰা মানকাচাৰ জিলাৰ আৰক্ষী অধীক্ষক কঙ্কণজ্যোতি শইকীয়াই । লগতে সকলো লৈ ইংৰাজী নৱবৰ্ষৰ শুভেচ্ছা জনাই সকলো আৰক্ষী বিষয়া জোৱানৰ লগতে সকলো ৰাইজৰ সহায় সহযোগ বিচাৰিলে জিলা আৰক্ষী অধীক্ষক গৰাকীয়ে। উল্লেখযোগ্য যে, উন্নয়নৰ ক্ষেত্ৰত পিছ পৰি থকা জিলাখনৰ মূল সমস্যা হৈছে গৰাখহনীয়া আৰু যাতায়ত ব্যৱস্থা। সেয়ে নতুন বছৰত বিভিন্ন চৰকাৰী আঁচনি ৰূপায়ণ কৰি সৰ্বাংগীন উন্নয়নমূলক পৰিকল্পনা কৰিছে জিলা প্ৰশাসনে।
