ধুবুৰী, 27 জুনঃ দক্ষিণ শালমাৰাৰ হাজিৰহাট সমবায় সমিতিত বিয়াগোম দুৰ্নীতিৰ অভিযোগ । গ্ৰাহকক ৰাম ঠগন দি লুটিছে কুইন্টলে কুইন্টলে চাউল আৰু কেৰাচিন । দুৰ্নীতিৰ বিৰুদ্ধে শূন্য সহনশীল নীতি অৱলম্বন কৰা বিজেপি চৰকাৰৰ দিনত মানকাচৰৰ খাদ্য আৰু অসামৰিক যোগান বিভাগৰ অধীনত থকা হাজিৰহাট সমবায় সমিতিৰ প্ৰতিজন গ্ৰাহকক দি আহিছে ৰামঠগন ৷ খাদ্য আৰু অসামৰিক যোগান বিভাগৰ প্ৰতিজন সুলভ মূল্য গ্ৰাহকৰ পৰা 5 কিলোগ্ৰামৰ বিপৰীতে 4 কিলোগ্ৰামৰ চাউল গ্ৰাহকক দি প্ৰতিজন গ্ৰাহকৰ পৰা 1 কিলোগ্ৰামকৈ চাউল আত্মসাৎ কৰাৰ উপৰি কেৰাচিন তেল প্ৰতিখন ৰেচন কাৰ্ডত তিনি লিটাৰৰ বিপৰীতে আঢ়ৈ লিটাৰ কৈ দি আধা লিটাৰ কৈ আত্মসাৎ কৰাৰ গুৰুতৰ অভিযোগ হাজিৰহাট সমবায় সমিতিৰ একাংশ গ্ৰাহকৰ ৷ ঘটনা সন্দৰ্ভত দক্ষিণ শালমাৰা মানকাচৰ উপায়ুক্তক এখন লিখিত অভিযোগ গ্ৰাহকে দাখিল কৰিছে যদিওঁ আজিলৈ কোনো সঁহাৰি পোৱা নাই । আনহাতে, বিভাগীয় নিয়ম মতে এক লিটাৰ নীলা কেৰাচিন তেলৰ মূল্য 32 টকা কিন্তু সমবায় কৰ্তৃপক্ষই 40 টকাকৈ লোৱাৰ অভিযোগ উত্থাপিত হৈ আহিছে ৷
উল্লেখযোগ্য যে, দুৰ্নীতিৰ বিৰুদ্ধে শূণ্যসহনশীল নীতি অৱলম্বন কৰা বিজেপি চৰকাৰ তথা জিলা প্ৰশাসনে হাজিৰহাট সমবায় সমিতিৰ এই দুৰ্নীতিৰ বিৰুদ্ধে কেনে ধৰণৰ ব্যৱস্থা গ্ৰহণ কৰে সেয়া লক্ষনীয় বিষয় হৈ পৰিছে ৷
