পশ্চিম বিলাসীপাৰা,2 এপ্ৰিল : গণতন্ত্ৰৰ চতুৰ্থ স্তম্ভক ৰাজ্যিক মন্ত্ৰী পীযুষ হাজৰিকাই মুকলিকৈ ফোনযোগে ভাবুকি দিয়া কাৰ্যৰ বিৰুদ্ধে শুকুৰবাৰে বিলাসীপাৰাৰ প্ৰেছ ক্লাৱৰ উদ্যোগত পালন কৰা হয় দুঘণ্টীয়া অৱস্থান ধৰ্মঘট ৷
ধৰ্মঘটত অংশগ্ৰহণ কৰে আছু, অসম জাতীয়তাবাদী যুৱ ছাত্ৰ পৰিষদ, গৰিয়া মৰিয়া দেশী জাতীয় পৰিষদ, কৃষক মুক্তি সংগ্ৰাম সমিতি, আমছু, ছাত্ৰ মুক্তি সংগ্ৰাম সমিতি, নাথ যোগী ছাত্ৰ সন্থা প্ৰমুখ্যে কেইবাটাও দল-সংগঠনে ৷ বিলাসীপাৰা প্ৰেছ ক্লাৱৰ সন্মুখত দিনৰ 2 বজাৰ পৰা প্ৰতিবাদী কাৰ্যসূচী গ্ৰহণ কৰে সংগঠন কেইটাই ।
প্ৰতিবাদী কাৰ্যসূচীৰ জৰিয়তে বিভিন্ন দল-সংগঠন তথা সাংবাদিকসকলে মন্ত্ৰী পীযুষ হাজৰিকা হুচিয়াৰ, পীযুষ হাজৰিকাক গ্ৰেপ্তাৰ কৰক, সাংবাদিক নিগ্ৰহ বন্ধ কৰক, পীযুষ হাজৰিকাৰ প্ৰাৰ্থিত্ব নাকচ কৰক, গণতন্ত্ৰৰ চতুৰ্থ স্তম্ভক সন্মান কৰা শিকক, সাংবাদিকৰ নিৰাপত্তা সু-নিশ্চিত কৰক আদি বিভিন্ন শ্ল’গানেৰে পৰিস্থিতি উত্তাল কৰি তোলে । পৰৱৰ্তী সময়ত সাংবাদিকক এনেধৰণৰ ভয়-ভাবুকি দিয়াৰ পৰা বিৰত থাকিবলৈ মন্ত্ৰী পীযুষ হাজৰিকাক সকিয়াই দিয়ে প্ৰতিবাদকাৰীসকলে ।
লগতে পঢ়ক : সৰুক্ষেত্ৰীত হিমন্ত বিশ্ব শৰ্মা আৰু অতুল বৰাৰ বিশাল নিৰ্বাচনী সভা
