ধুবুৰী, 4 জানুৱাৰীঃ শুকুৰবাৰে নিশা ধুবুৰীৰ ভাৰত বাংলা সীমান্তৰ মহামায়াৰ চৰত আৰক্ষীৰ গুলীত আহত হোৱা দুলাল হুছেইন নামৰ লোকজনৰ মৃত্যু হয়৷ নিশা অসম আৰক্ষীয়ে উক্ত অঞ্চলটোত নিৰ্বিচাৰে গুলীচালনা কৰাৰ অভিযোগ উত্থাপন হৈছে ৷ তথ্য অনুসৰি আৰক্ষীৰ শুকুৰবাৰে আৰক্ষীৰ গুলীচালনাত নুৰজামাল নামৰ এজনলোক নিহত হোৱাৰ বিপৰীতে আন তিনিজনলোক গুৰুতৰ ভাৱে আহত হৈছিল ।
আহত লোক কেইজন ক্ৰমে দুলাল হুছেইন, পাসান আলী আৰু সাহা আলম৷ তিনিওকে সংকটজনক অৱস্থাত ধুবুৰী অসামৰিক চিকিৎসালয়ত ভৰ্তি কৰোৱা হৈছিল যদিও চিকিৎসকে তিনিওকে উন্নত চিকিৎসাৰ বাবে গুৱাহাটী চিকিৎসা মহাবিদ্যালয়লৈ প্ৰেৰণ কৰিছিল ৷ আৰু গুৱাহাটী চিকিৎসা মহাবিদ্যালয়লৈ গৈ থাকোতেই আধাবাটতেই দুলাল হুছেইনৰ মৃত্যু হয় ৷ এই ঘটনাৰ পাচতে শনিবাৰে পুৱা অঞ্চলটোত উত্তপ্ত পৰিস্থিতিৰ সৃষ্টি হয় ৷ পৰৱৰ্তী সময়ত দক্ষিণ শালমাৰা মানকাচাৰ জিলাৰ আৰক্ষী অধীক্ষক সহ আৰক্ষীৰ উচ্চ পদস্থ বিষয়া ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰে৷ আৰক্ষীয়ে নিহত নুৰজামালৰ মৃতদেহটো মৰণোত্তৰ পৰীক্ষাৰ বাবে প্ৰেৰণ কৰে যদিও অঞ্চলটোত চেপা উত্তেজনাই বিৰাজ কৰিছে৷
উল্লেখ্য যে, ৰাইজৰ অভিযোগ অনুসৰি শুকুৰবাৰে মাজনিশা দক্ষিণ শালমাৰা আৰক্ষী থানাৰ আৰক্ষীৰ দল এটাই কেইজনমান মুখা পিন্ধা লোকক লগত লৈ মহামায়াৰ চৰৰ কেইবাটাও পৰিয়ালৰ গোহালিৰ পৰা গৰু চুৰ কৰাৰ চেষ্টা চলায় । ৰাইজে উমান পাই চাৰিওফালৰ পৰা আৰক্ষীৰ দলটোক আৱৰি ধৰে । আৰু তেনে সময়তে আৰক্ষীয়ে গুলীচালনা আৰম্ভ কৰে ৷ ফলত আৰক্ষীৰ গুলীত থিতাতে নিহত হয় নুৰজামাল নামৰ এজন যুৱক৷ আনহাতে দুলাল হুছেইন, পাসান আলী আৰু আলম নামৰ তিনিজনলোক গুলীবিদ্ধ হয় ৷ ইপিনে ৰাইজে তিনিওকে অতি সংকটজনক অৱস্থাত নাৱেৰে ব্ৰহ্মপুত্ৰ নদীৰ পথেৰে গৈ বাঁহৰ সাঙিত বান্ধি ধুবুৰীত উপস্থিত হয় যদিও 108 মৃত্যুঞ্জয় সেৱাৰ পৰা বঞ্চিত হ'ব লগীয়া হয় আহত লোক কেইজন ৷ বহু সময় যোগাযোগ কৰাৰ পিচতো 108এম্বুলেঞ্চ সেৱাই কোনো সঁহাৰি নিদিয়াৰ অভিযোগ স্থানীয় ৰাইজৰ ৷ পৰৱৰ্তী সময়ত এখন ব্যক্তিগত বাহনেৰে আহত কেইজনক ধুবুৰী অসামৰিক চিকিৎসালয়লৈ লৈ যোৱা হয় ৷
আনহাতে ৰাইজৰ অভিযোগ অনুসৰি দীর্ঘ দিনৰ পৰাই দক্ষিণ শালমাৰা আৰক্ষী থানাৰ আৰক্ষীয়ে চোৰাং গৰুৰ বিৰুদ্ধে অভিযান চলোৱাৰ নামত ৰাইজৰ গোহালিৰ পৰা গৰু চুৰি কৰি নি বিক্ৰী কৰি আহিছে । দক্ষিণ শালমাৰা আৰক্ষীৰ বিৰুদ্ধে উত্থাপন হোৱা এনে গুৰুতৰ অভিযোগৰ পিচত আৰক্ষীয়ে কি প্ৰতিক্ৰিয়া প্ৰকাশ কৰিব সেয়া পৰৱৰ্তী সময়তহে স্পষ্ট হ'ব ৷ যদিও এই ঘটনাক কেন্দ্ৰ কৰি সীমান্তৰ মহামায়াৰ চৰত আৰক্ষী, চি.আৰ.পি.এফ আৰু বি.এছ.এফৰ জোৱান মোতায়ন কৰি পৰিস্থিতি শান্ত কৰাৰ প্ৰয়াস চলাইছে ৷ উল্লেখ্য যে, হঠাৎ সীমান্ত অঞ্চলত আৰক্ষীয়ে কিয় গুলীচালনা কৰিবলগীয়া হ'ল নাইবা প্ৰকৃততে নিশা সীমান্তত কি হৈছিল সেয়া আৰক্ষীৰ নিৰপেক্ষ তদন্তৰ পিচতহে পোহৰলৈ আহিব ৷
লগতে পঢ়ক - তৰুণ গগৈ বিজেপিত আহিব বুলি মই শুনি আছোঃহিমন্ত বিশ্ব শৰ্মা
