ধুবুৰী,28 মাৰ্চ: দেওবাৰে ৰঙৰ উৎসৱ ফাকুৱা । হোলীৰ আনন্দত মতলীয়া ৰাজ্যৰ প্ৰতিটো প্ৰান্ত ৷ ৰাজ্যৰ ভিন্ন প্ৰান্তৰ লগতে ফাকুৱাৰ ৰঙত ৰঙীণ হ’ল পশ্চিম অসমৰ ধুবুৰী জিলা । ধুবুৰী ৰাজীৱ গান্ধী উদ্যানত উদযাপন কৰা হৈছে বসন্ত উৎসৱ । বিভিন্ন সাংস্কৃতিক গোষ্ঠীৰ নৃত্যত উখল মাখল পৰিৱেশ । কণ কণ শিশুৰ পৰা আৰম্ভ কৰি যুৱক-যুৱতী সকলে হাতত ভিন্ন ৰং লৈ কৰিছে ধেমালি । ইজনে সিজনক ফাকুৱাৰ ৰঙেৰে ৰঙীণ কৰি হোলীৰ শুভেচ্ছা জ্ঞাপন কৰিছে ।
ইপিনে দলীয় প্ৰাৰ্থীৰ হৈ নিৰ্বাচনী প্ৰচাৰ চলাবলৈ ধুবুৰীত উপস্থিত হোৱা কেন্দ্ৰীয় মন্ত্ৰী জিতেন্দ্ৰ সিঙে দলীয় প্ৰাৰ্থী ডাঃ দেৱময় সান্যালক লগত লৈ উপস্থিত হয় ৰাজীৱ গান্ধী শিশু উদ্যানত । বসন্ত উৎসৱত অংশ লৈ মন্ত্ৰী গৰাকীয়ে ললে জিলেপীৰ সোৱাদ ।
ইয়াৰ পিছতে নিজৰ ভাষণত ধুবুৰীবাসী ৰাইজক হোলীৰ শুভেচ্ছা জ্ঞাপন কৰি নিজৰ কৌশলী মন্তব্যৰে ৰাইজক নিৰ্বাচনী টোপ দিলে মন্ত্ৰী জিতেন্দ্ৰ সিঙে । পিছে নিৰ্বাচনী আচৰণ বিধিলৈ ভয় মন্ত্ৰী গৰাকীৰ । যাৰ বাবে কৌশলী মন্তব্যৰে হোলী উৎসৱ অনুষ্ঠানত উপস্থিত হৈ মন্ত্ৰী গৰাকীয়ে চলালে নিৰ্বাচনী প্ৰচাৰ ।
উল্লেখ্য যে, ৰাজ্যত ক’ভিড মহামাৰীয়ে দ্বিতীয় বাৰৰ বাবে মহামাৰীৰ ৰূপ লোৱাৰ সময়তে এক প্ৰকাৰ ক’ভিড প্ৰটকলক আওকাণ কৰি লোকে লোকৰণ্য হ’ল ধুবুৰীৰ ৰাজীৱ গান্ধী শিশু উদ্যান ।
লগতে পঢ়ক: মহাজোঁট বন্ধনৰ প্ৰাৰ্থী স্বপন কুমাৰ মণ্ডলৰ সৈতে বিশেষ সাক্ষাৎকাৰ
