ধুবুৰী, 17 জুনঃ এখিলা এখিলাকৈ খহিবলৈ ধৰিছে চাৰিশ বছৰ পুৰণি ঐতিহাসিক গৌৰীপুৰৰ ৰাজবাৰী৷ সোতৰশ শতিকাৰ প্ৰথম ভাগতে গৌৰীপুৰত থিতাপি লৈছিল ৰজা প্ৰভাত চন্দ্ৰ বৰুৱাই ৷ তেৱেঁই গৌৰীপুৰৰ বৰুৱা পট্টিত নিৰ্মাণ কৰিছিল ইতিহাস প্ৰসিদ্ধ এই ৰাজবাৰী ৷ চীনা শিল্পী আৰু কলকাতাৰ শিল্পীৰ হাতৰ পৰশত আটকধুনীয়াকৈ প্ৰাণ পাই উঠিছিল এই ঐতিহাসিক ৰাজ প্ৰাসাদে ৷ তাৰ পৰৱৰ্তী সময়ত ইংৰাজ ৰাজত্ব কালত ১৯১৪ চনত চীনা শিল্পীৰ নিপুণ হাতৰ পৰশত গঢ় লৈ উঠিছিল গৌৰীপুৰ ৰজাৰ হাৱা মহল ৷
বৰ্তমান ৰাজবাৰীৰ তিনি মহলীয়া অন্দৰ (ভিতৰ) মহলৰ মূল অট্টালিকাত ৰজা প্ৰভাত চন্দ্ৰ বৰুৱাৰ পৰিয়াল থকাৰ বিপৰীতে, বহিঃ মহলত থকা অট্টালিকাত ৰজা প্ৰতাপ চন্দ্ৰ বৰুৱাৰ পৰিয়ালে বসবাস কৰে ৷ ইয়াৰোপৰি গৌৰীপুৰৰ মাটিয়াবাগৰ পাহাৰৰ টিলাৰ ওপৰত থকা ৰাজবাৰীৰ হাৱা মহলত বসবাস কৰে ৰজাৰ কণিষ্ঠ ভাতৃ প্ৰকৃতিশ চন্দ্ৰ বৰুৱাৰ পৰিয়ালে ৷ এই হাৱা মহলৰ লগতে জড়িত হৈ আছে ৰজাৰ কনিষ্ঠ ভাতৃ প্ৰকৃতিশ চন্দ্ৰ বৰুৱাৰ কন্যা, পদ্মশ্ৰী প্ৰতিমা বৰুৱা পাণ্ডেৰ বহু সৃষ্টিৰাজি আৰু স্মৃতি ৷ কিন্তু সম্প্ৰতি কালৰ গৰাহত বিলীন হোৱাৰ পথে ইয়াৰ লগত জড়িত আপুৰুগীয়া ইতিহাস ৷
গৌৰীপুৰৰ ৰজাই হাতীৰ পিঠিত উঠি চিকাৰ কৰিবলৈ যোৱা উদাহৰণ আজিও স্পষ্ট হাৱা মহলত ৷ ৰাজ পৰিয়ালে নিজাববীয়াকৈ ৰজাদিনীয়া আপুৰুগীয়া সম্পদ সমূহ সংৰক্ষণৰ চেষ্টা কৰিছে যদিও, ক্ৰমাৎ সেইবোৰ বিলীন হ'ব ধৰিছে কালৰ গৰাহত ৷
বিগত ত্ৰিশ বছৰৰ পৰা গৌৰীপুৰৰ ৰাজবাৰী আৰু হাৱা মহল পৰ্যটন ক্ষেত্ৰ হিচাপে সংৰক্ষণৰ দাবী জনাই আহিছে ৰাজ পৰিয়ালৰ লোকে ৷ কিয়নো এই ৰাজবাৰী পৰিদৰ্শনৰ বাবে আহে বহু পৰ্যটক ৷ কিন্তু অগপৰ পৰা বৰ্তমানৰ বিজেপি চৰকাৰলৈ কোনো এখন চৰকাৰেই আশ্বাসৰ প্ৰদানৰ বাদে অইন কোনো কাম কৰা নাই এই ৰাজবাৰীৰ ঐতিহ্য সংৰক্ষণৰ বাবে ৷ এই অভিযোগ ৰাজ পৰিয়ালৰ সদস্যৰ ৷
ইতিহাসৰ স্বাক্ষৰ বহনকাৰী এই ঘৰ কেইটাৰ আন্তঃগাথনিয়ে সম্প্ৰতি চিন্তিত কৰি তুলিছে পৰ্যটক সকলকো ৷ ৰাজ পৰিয়ালৰ চৰকাৰৰ ওচৰত আহ্বান অতি শীঘ্ৰেই এই ইতিহাস প্ৰসিদ্ধ ঘৰসমবহ সংৰক্ষণ কৰি যাতে গৌৰীপুৰৰ গৰিমা যুগমীয়া কৰি ৰাখে ৷
লগতে পঢ়কঃ লক ডাউনত 'আৰোগ্য যোগ কেন্দ্র'ৰ ব্যতিক্রমী পদক্ষেপ
