বিলাসীপাৰা, 25 এপ্ৰিল : বিলাসীপাৰাৰ বৰকান্দা পিপলচ একাডেমী উচ্চতৰ মাধ্যমিক বিদ্যালয়ত স্থাপন কৰা বৰকান্দা কোৱাৰেণ্টাইন কেম্পত শনিবাৰে স্বাস্থ্য মন্ত্ৰী ডঃ হিমন্ত বিশ্ব শৰ্মা উপস্থিত হৈ কোৱাৰেণ্টাইনত থকা লোকসকলৰ স্বাস্থ্যৰ বুজ লয় ৷ স্বাস্থ্য মন্ত্ৰীগৰাকীৰ সৈতে উপস্থিত থাকে মন্ত্ৰী পীযুষ হাজৰিকা ৷
উল্লেখ্য যে, বৰ্তমান কেম্পটোত ৫ গৰাকী মহিলাসহ ৫২ গৰাকী পুৰুষ কোৱাৰেণ্টাইন হৈ আছে ৷ দিল্লীৰ নিজামুদ্দিন মাৰ্কাজৰ পৰা বিলাসীপাৰাত উপস্থিত হোৱা ৰাজ্যৰ ৫ গৰাকী মহিলাসহ 10 গৰাকী তবলীগি জামাতীক 1 এপ্ৰিল তাৰিখে বৰকান্দা কোৱাৰেণ্টাইন কেম্পত ৰখা হৈছিল ৷ ইয়াৰ পিছতে ধুবুৰী জিলাৰ কৰ’ণাত আক্ৰান্ত হাজী জামালুদ্দিন,ৰহিমুদ্দিন আৰু ৰছিদা বিবিৰ সংস্পৰ্শলৈ অহা মুঠ ৫২ গৰাকী লোককো বৰকান্দা কোৱাৰেণ্টাইনত ৰখা হয় ৷
বৰকান্দা কোৱাৰেণ্টাইন কেম্পত উপস্থিত হৈ মন্ত্ৰী হিমন্ত বিশ্ব শৰ্মাই কোৱাৰেন্টাইন হৈ থকা লোকসকলক পৰ্যবেক্ষণ কৰে আৰু ইয়াৰ এক প্ৰতিবেদন দিল্লী চৰকাৰলৈ প্ৰেৰণ কৰিব ৷ দিল্লী চৰকাৰৰ নিৰ্দেশমৰ্মে প্ৰতিগৰাকী লোকক পৰীক্ষাৰ অন্তত অৰ্থাৎ ২৮ দিনৰ পিছতহে মুকলি কৰি দিয়া হ’ব বুলি তেওঁ জানিবলৈ দিয়ে ৷
ইফালে একেদিনাই গোলকগঞ্জৰ অসম-বংগ সীমান্তৰ ছাগলীয়াত নিৰ্মীয়মাণ অৱস্থাত থকা কোৱাৰেণ্টাইন কেম্পৰ কামৰ বুজ ল’বলৈও উপস্থিত হয় স্বাস্থ্য মন্ত্ৰীগৰাকী । আগন্তুক 30 এপ্ৰিলৰ ভিতৰত ছাগলীয়া আৰু শ্ৰীৰামপুৰত এই কোৱাৰেণ্টাইন কেম্পটো সম্পূৰ্ণ হ’ব বুলি মন্ত্ৰী হিমন্ত বিশ্ব শৰ্মাই জানিবলৈ দিয়ে । অৱশ্যে ছাগলীয়া কোৱাৰেণ্টাইন কেম্পত 700 জন লোকক আৰু হালাকুৰা বিদ্যালয়ত ৩০০ জন লোকক কোৱাৰেণ্টাইনত ৰাখিব বুলি তেওঁ কয় ।
উল্লেখ্য যে, লক ডাউনৰ অন্তত বহিঃৰাজ্যৰ পৰা অহা অসমৰ লোক সকলক প্ৰথমে স্বাস্থ্য পৰীক্ষা কৰি তেওঁলোকক কোৱাৰেণ্টাইনত ৰখা হ’ব বুলি স্বাস্থ্য মন্ত্ৰীগৰাকীয়ে সংবাদ মাধ্যমৰ আগত ব্যক্ত কৰে ৷
লগতে পঢ়ক : ই টিভি ভাৰতৰ বাতৰিৰ প্ৰভাৱ,দৰিদ্ৰ পৰিয়াললৈ সহায়ৰ হাত ইউনাইটেড শিখ সংস্থাৰ
