ধুবুৰী,22 এপ্ৰিল: ধুবুৰীৰ গৌৰীপুৰ আৰক্ষীৰ অন্তৰ্গত লালকুৰাত আৰক্ষীয়ে অভিযান চলাই জাল নোটৰ লগতে চাৰিটাকৈ পিষ্টল উদ্ধাৰ কৰে ৷ গৌৰীপুৰ আৰক্ষীৰ সহযোগত ধুবুৰী আৰক্ষীয়ে অভিযান চলাই গাঁৱখনৰ মজিবৰ ৰহমান নামৰ এজন লোকৰ ঘৰত এই সামগ্ৰীখিনি উদ্ধাৰ কৰে ৷
গোপন সূত্ৰৰ তথ্যৰ ভিত্তিত আৰক্ষীয়ে চলোৱা এই অভিযানত উদ্ধাৰ হয় চাৰিটাকৈ হস্তনিৰ্মিত পিষ্টল । লগতে উদ্ধাৰ হৈছে গুলী প্ৰস্তুত কৰা আপত্তিজনক সামগ্ৰী আৰু এক লাখ ভাৰতীয় টকাৰ জাল নোট । ইয়াৰ সৈতে জড়িত থকাৰ অভিযোগত মজিবৰ ৰহমান নামৰ লোকজনক গ্ৰেপ্তাৰ কৰে আৰক্ষীয়ে । ধৃত ৰহমানক জেৰা অব্যাহত ৰাখিছে আৰক্ষীয়ে ।
উল্লেখ্য যে, ধৃত লোকজন কোনো উগ্ৰপন্থী সংগঠনৰ সৈতে জড়িত আছে নে নাই সেয়া আৰক্ষীৰ জেৰাৰ পাচতে পোহৰলৈ আহিব । কিন্তু এগৰাকী খেতিয়কৰ ঘৰৰ পৰা চাৰিটাকৈ পিষ্টল আৰু জাল নোট উদ্ধাৰ হোৱাৰ ঘটনাই অঞ্চলজুৰি চাঞ্চল্যৰ সৃষ্টি কৰিছে ৷
লগতে পঢ়ক: অ'এনজিচিৰ কৰ্মচাৰী অপহৰণৰ তদন্তৰ দায়িত্ব ল'লে জি পি সিঙে
