ধুবুৰী,4 আগষ্ট: ধুবুৰীত বানৰ পিছতে তীব্ৰ ৰূপ ধাৰণ কৰিছে গৰাখহনীয়াই ৷ জিলাখনৰ দক্ষিণ শালমাৰা সমষ্টিত খহনীয়াই তাণ্ডৱ চলোৱাৰ ফলত ৰাজ্যৰ ভৌগোলিক মানচিত্ৰৰ পৰা এই অঞ্চলটো ক্ৰমাৎ নিশ্চিহ্ন হোৱাৰ দিশে অতিক্ৰম কৰিছে ৷ বিগত সময়ছোৱাত বহুকেইটা পৰিয়াল খহনীয়াৰ কবলত পৰি উছন হোৱাৰ লগতে হেৰুৱাইছে ঘৰ-বাৰী ৷ ১৯৫০ চনৰ বৰ ভূঁইকপৰ পিছৰ পৰা দক্ষিণ শালমাৰাৰ বিভিন্ন অঞ্চলত কালৰূপী খহনীয়াই চলাই আহিছে তাণ্ডৱ ৷ ধুবুৰীৰ ফকিৰগঞ্জ, মাটিফাটা, চতলাৰ পাৰ, হাজিৰহাট,পাটকাটা আদি অঞ্চলত খহনীয়াই তীব্ৰ ৰূপ ধাৰণ কৰাত স্বাভাৱিকতে আতংকিত হৈ পৰিছে জনসাধাৰণ ৷ খহনীয়াৰ এনে এক ভয়ংকৰ দৃশ্য আৱদ্ধ হৈছে স্থানীয় লোকৰ কেমেৰাত ৷ মঙলবাৰে খহনীয়াত জাহ যায় অঞ্চলটোৰ ইছলামধৰ্মী লোকসকলৰ ধৰ্মীয় অনুষ্ঠান বেৰাভাঙা ঈদগাহ ৷
উল্লেখ্য যে, এনে গৰাখহনীয়া প্ৰতিৰোধৰ বাবে চৰকাৰে প্ৰতিবছৰে বাঁহ আৰু আৰচিচি পাৰ্কুপাইনৰ আঁচনিৰ নামত মোকোলাই দিয়ে কোটি কোটি টকা ৷ কিন্তু বিভাগীয় কৰ্তৃপক্ষই খহনীয়া ৰোধৰ নামত কিছু কাম কৰিয়ে সামৰে দায়িত্ব ৷ স্থানীয় ৰাইজে অভিযোগ কৰা অনুসৰি, এই আঁচনিৰ নামত আবণ্টিত অধিকাংশ ধন সোমাইছে একাংশ বিষয়া আৰু ঠিকাদাৰৰ পকেটত ৷ খহনীয়াত সৰ্বস্বান্ত পৰিয়ালসমূহৰ সুৰক্ষাৰ স্বাৰ্থত বিভিন্ন সংগঠনে খহনীয়াৰ স্থায়ী প্ৰতিৰোধৰ বাবে ব্যৱস্থা গ্ৰহণ কৰিবলৈ বিভিন্ন সময়ত চৰকাৰক দাবী উত্থাপন কৰি আহিছে ৷ কিন্তু চৰকাৰ আৰু সাংসদ বদৰুদ্দিন আজমলৰ উপৰিও বিধায়ক ৱাজেদ আলী চৌধুৰীয়ে এই বিষয়ত প্ৰদান কৰা নাই কোনো গুৰুত্ব ৷ যাৰ ফলত স্থলভাগৰ পৰা নোহোৱা হোৱাৰ পথত বৰ্তমান ধুবুৰী জিলাৰ দক্ষিণ শালমাৰা সমষ্টি ৷ ৰাজ্য চৰকাৰে শীঘ্ৰে এই বিষয়ত স্থায়ী প্ৰতিৰোধৰ ব্যৱস্থা গ্ৰহণ নকৰিলে সমূহীয়া আত্মজাহৰ হুংকাৰ প্ৰদান কৰিছে ভুক্তভোগী আৰু খহনীয়াত সৰ্বস্বান্ত হোৱা ৰাইজে ৷
লগতে চাওকঃ গণতন্ত্ৰৰ কথা কোৱাৰ অধিকাৰ নাই কংগ্ৰেছৰ: ৰণোজ পেগু
